樓市出更：代理好彩仲有車位賣

政府上周突然推出加強版壓抑樓市新招，令一、二手交投「急煞車」。不過，發展商就趁非住宅物業仍然可以「自由買賣」下，以高佣催谷代理推售車位，為地產代理們帶來及時雨，好似新地（00016）嘅西南九龍瓏璽車位，以每個180萬至190萬元推售，每個車位代理佣金高達1.5萬元。

劉Sir收到風，新地嘅西南九龍瓏璽車位，發展商計劃分成三批出售，首批買家會係收到信嘅四房單位業主，預計會晌下個月十七號賣。

瓏璽每個賣180萬起

視乎位置，瓏璽每個車位售價由180萬至190萬元不等，每個車位嘅佣金高達1.5萬元。

但為免混亂，限定買車位時，代理最好要同埋個客一齊到場揀車位，至於其餘三房或以下單位買家幾時有得揀車位，又或者屆時經紀會唔會有機會「袋到」呢份佣，發展商就未有交代。

至於之前一直賣緊嘅朗逸峯車位，發展商長實（00001）見市況靜靜哋，亦決定以4%佣金委託代理促銷車位，並推出40幾個車位，售價由21萬去到28萬不等。事實上，車位唔似住宅要收額外印花稅（SSD）同買家印花稅（BSD），對投資者嚟講有一定吸引力。

上季二手登記1294宗

其實，住宅車位需求強勁，刺激車位價格急升，中原研究部資料睇到，第三季二手住宅車位平均每宗成交金額達64萬元，比第二季嘅60萬再升6.7%，更加創出歷年次高嘅紀錄，僅僅低過九七年第四季嘅66萬元。

季內，錄得呢類車位買賣登記有1,294宗，總值大約8.29億元，比第二季分別上升5.5%同13.1%，金額創近十五年按季新高。不過，由於新車位供應短缺，同期一手買賣登記同金額，分別按季大跌37%同49.3%。

以屋苑劃分，車位買賣登記最多係何文田半山壹號，有達190宗，總值2.28億元；而美孚新邨同大圍金獅花園就分別排第二及第三位。