Fundman睇市：買REITs避險

華爾街日報都撰文「香港樓市泡沫就要破裂了嗎？」，曾財爺今次拋出SSD及BSD兩大辣招，就連海外傳媒都引起迴響，睇埋措施出台後，首個周末本地新盤及二手盤成交急劇萎縮，五隻地產藍籌股急挫4.7至6.4%不等，創七個月以來最大單日跌幅，看來樓市有如近日天氣一樣，泛起陣陣涼意。

由於不少私募基金及房地產信託基金，都有涉足本地住宅投資，15%BSD實施之後，交易成本急升，短期都無機會入貨，消息公布後地產股大插水，反而揸磚頭的REITs則做好，領匯（00823）創上市新高，置富（00778）、冠君產業（02778）亦報升，資金是否搵有yield的磚頭房託泊住先？睇嚟機會都唔細。

五隻藍籌地產股拖低大市81點，結算前的港股悶足全日，收報21,511點，跌34點，走勢算中規中矩。中資股的第三季業績繼續有驚喜，中石化（00386）首三季賺419.46億人民幣，跌三成，但庫存回撥帶動下，第三季業績優於預期，股價升2.8%，報8.25元。分析員估計第四季煉油及化工業務可持續復甦，但過去一個月股價已累升14%，唔少利好因素早已反映，可揸但再加注誘因有限。

農行（01288）在較預期低的撥備下，業績優於預測，股價彈3.1%至3.34元，抵達目標3.3元。不過四大行中佢仲係最執輸果隻，睇好第四季內銀仲有得升，可繼續揸住等收成。

家電股估值唔算貴

月中發盈喜的海信科龍（00921），首三季業績正式曝光，多賺81%至5.95億，股價愈升愈有，昨日破位升14.6%，報2.51元，如果按平均每季賺1.98億，目前市值68.7億港元，市盈率8倍，加埋三四五線城市白家電銷售優於一線城市的概念支持，估值仲係唔貴。

創維（00751）今年大力在鄉鎮市場催谷3D多媒體電視，今年三至九月上半年度，高階產品銷售增長達21%，攪到唔少分析員都跌晒眼鏡，尤其八、九月份營運數據顯示，內地銷售增長由六、七月一成左右升幅，擴大到兩成七，其股價也由九月初低位3.04元起步，炒到上星期最高見過4.42元。

以預測全年賺15.42億計，創維的市盈率7.2倍，計入未來兩年平均12%增長，估值仲算吸引，如果重返10日線4.12元樓上，確認短期調整完成，可以考慮再上車，上望去年5至5.2元的阻力。