股海實戰：波司登買定等過冬

特區政府重拳出擊打壓樓市炒風，地產股全線走低，粗略估計信置（00083）、恒地（00012）、新世界（00017）、長實（00001）及新地（00016）五大地主股，尋日合共蒸發市值469億元。美聯集團（01200）喺預期樓市交投將大受影響下，股價急挫14.5%。反觀收租股跌幅相對溫和，領匯（00823）股價更逆市創新高。

一如所料，地產股冇運行，游資選擇唔多，部分已急不及待翻兜中資股，尋日水泥股全線向上，導因係內地傳媒報道，九部委醞釀政策推動鋼鐵、水泥、汽車、機械製造、電解鋁、稀土、電子訊息、醫藥等八大重點行業兼併重組。老實講，呢個政策講咗N咁多次，唔係咩新嘢，尋日相關股份升勢暫宜以反彈視之，後市仍要視乎熱錢取向。

結算後大市見真章

正由於部分中資股反彈，三大石油股及大笨象（00005）企穩撐住半邊天，恒指尋日只係跌34點收場，報21,511點。今日係期指結算日，究竟呢幾日恒指頂住喺高位係咪純粹因為期指結算因素，好快有答案。尋日恒指尚未收復10日線21,517點，若然呢個位支持經得起考驗，十一月上旬前恒指仍有機會再試衝22,000點大關。

天文台預計，今年冬天寒流持續嘅時間較長，氣溫亦較低。炒家心水清，尋日炒起隻羽絨服裝股波司登（03998），收市升4.72%，報2.44元，乃三月下旬以來收市新高，成交3,398萬元。

波司登旗下四大羽絨服品牌喺內地嘅市佔率超過三成，若然嚟緊寒流較往年厲害，相信產品銷情必可受惠，再加上近年公司積極拓展非羽絨多元化產品，有利平衡每季銷售表現；而拓展海外市場方面，今年七月倫敦自置物業旗艦店已開幕，相信截至明年三月底止嘅年度業績會有好表現，現價預測市盈率9倍，息率7厘，估值吸引。

論走勢，波司登股價尚處次季以來嘅上升浪中，尋日呈現突破，成交配合，目前14日RSI處67，經驗顯示，等14日RSI升穿70樓上始有回吐，是浪目標挑戰五十二周高位2.68元，支持位可參考50日線2.25元。