樓市出更：工商舖大旺逼政府出招

政府話會密切留意工商舖市場，或會將辣招伸延至該市場，辣招未殺埋身，投資磚頭保值最佳選擇只有工商舖車位等；有代理就話，過去幾日佢哋公司收到嘅工商舖問盤按周多10%，唔少仲係住宅炒家，而城中張姓資深投資者出招後亦大手入市，連環掃入4項商用物業，共涉資近8,000萬元。

財爺曾俊華尋日話，會密切留意工商舖市場發展，唔排除會引入調控措施，但喺住宅新一輪辣招實施後至今，唔少資金已計劃轉投或加重放喺工商物業上，美聯工商舖（00459）行政總裁黃漢成同劉Sir講，過去三日佢哋收到大批工商舖問盤，當中大部分以中長線投資居多，反映目前工商舖買家以長線投資為主。

事實上，投資者已爭先入市，上述張姓投資者話，政府新住宅調控措施出台後至尋日為止，已經買咗4項商用物業，其中，中環鴨巴甸街19號全幢商業物業，購入價近5,000萬元，呎價約1.25萬元。

舖壇老手半億入貨

而舖壇老手黃海明話，政府「出口術」考慮將調控措施擴至工商舖，相信其動機都係唔想住宅投資者突然將啲錢抽調到工商舖。為表明對工商舖後市充滿信心，日前斥逾半億元買入灣仔道146號地舖，呎價逾6.3萬元。

另資深投資者廖偉麟話，香港工商舖買賣某程度上反映各投資者對香港經濟前景嘅信心，故政府應慎重考慮。

九龍灣商廈齊破頂

打擊住宅炒賣新措施後，九龍灣連錄兩宗商廈呎價破頂沽出。中原蔡鳴楚話，其士商業中心中層09室，啱啱1,295幾萬元賣咗，呎價7,148萬元，係該廈呎價新高，現時該廈即有業主封盤外，另有提價，加幅約15%；該行黃旭偉說，同區南豐商業中心低層06室，以逾928萬元易手，呎價約7,820元，創該廈呎價新高。

政府唔知會唔會出招調控工商舖，過億元工商舖買賣繼續旺。消息稱，尖沙咀加連威老道單號地舖，獲醫護專業人士以逾1.2億元購入。另高力國際甄浚岷話，剛截標嘅中環荷李活道94號全幢唐樓以6,680萬元售，呎價近3.4萬元。據土地註冊處資料，買家係陳肇文及羅彩麗，同曾投資南區豪宅嘅投資者同名。