市場徐想：買內房債咪純睇息率
樓市水漲船高，但論收租回報都只係4厘息左右。由於資金想要有較高息回報，而風險又想要喺可控制範圍內，於是造就咗機會畀好多公司喺市場上發債。
過去一個月，先後共有4間內房股發行高息優先票據，抽走近百億元。雖然內房高息債券備受追捧，但部分原因都係同資金推波助瀾有關。依家只係反映信貸市場預期內地宏觀經濟同房地產中線維持穩定、前景漸見明朗。
不過，內房盈利表現唔係由市場基本因素推動，選擇內房債券時，應注重公司嘅個別因素，唔好只係比較息率面上高低。話就話債券風險較低，但若因公司破產而無法贖回，依然會贏粒糖、輸間廠。