牛熊對壘：中銀夠穩陣吼19106

唔到你拗頸，十連升都出現，技術嚴重超買的港股，果真令唔少市場中人跌晒眼鏡。恒指昨日收報21,810點，升46點，見十四個月新高。

恒指昨日輕微高開後一度倒跌，後在滙控（00005）力撐下回升，即市高低波幅129點，高位見21,839點，較前日高位僅高出37點，8隻恒指熊證被強制回收，其中7隻是剛上市的新熊證，被劏街貨只有482萬份，傷亡未算嚴重。

恒指9日RSI升至85水平，現時追入牛證的值博率肯定大降，但要博熊證又怕好嘅唔靈、醜嘅靈，十連升之後再出現十一或十二連升，熊仔「陰陰乾」，最佳的方法是轉睇Put輪走短線，起碼有仇報，現時恒指三個月期或以下的Put輪平均引伸波幅不過是22%。另一方法是要避開貼價熊證，距現價約600點收回點數的恒熊，槓桿比率都有二十多倍。

滙控窩輪交投活躍

昨日牛熊證成交按日升4.8%至54.61億元，窩輪成交升5.4%至76.71億元。滙控昨先跌後升，收市彈近1%，為恒指貢獻了33點升幅，相關窩輪活躍，錄得6億元成交額，是第二大成交個股窩輪，佔整體窩輪成交7.8%。即市所見，有資金流入其Call輪好倉。其他藍籌股如和黃（00013）、新地（00016）都有資金流入好倉，投資者要睇實好倉後向。

前日恒指Call輪及牛證錄得3,114萬元資金流入，淡倉同樣流入資金約1,810萬元，反映現水平進退維谷，好淡爭持。不過，多隻近周累升不少的股份大幅回吐，如電訊設備股、機械股以至水泥股都明顯見沽壓，內銀股則個別發展。

中銀香港（02388）昨日收市後出季度業績，第三季度撥備前盈利按季升2.4%至61.55億元，大致符合預期。高盛上周提早為其把脈，料撥備前盈利是61.5億元，重申「買入」評級，睇30元。不妨考慮中銀大和購（19106），明年九月三日到期，行使價25.88元，實際槓桿6.8倍，引伸波幅27%。