股海實戰：中海油實力之選

港股尋日大部分時間進行整固，但大笨象（00005）撐住半邊天，到臨尾半個鐘先見到有飛機盤入場掃貨，結果恒指實現「十連升」。不過，唔少近期熱炒嘅股仔卻出現顯著回吐，未知是否缸邊友對後市信心開始有點動搖。

唔知各位有冇發覺，呢期魚缸活躍番，部分二、三線股上落速度都幾快，阿莊就試過即市炒賣好幾隻股仔，一掃落去，好快有盤跟掃一、兩檔；遇上股價向下，一質落去，又好快有沽盤殺低一、兩檔，總之反應十分之快。為此請教資深卜架，原來近一、兩年魚缸淡靜，好多莊家為慳皮費，有別於過去請卜架睇場，多咗以預設電腦程式來維持秩序，所以股仔掃上質低都會好快有盤跟進，因此呢啲股仔股價一係唔郁，一郁上落波幅都比較大。

雙幣證券料成風氣

合和公路（00737）創新猷，發行雙幣證券，尋日復牌，股價跌5%，相信係反映發新股作價折讓同攤薄效應。阿莊認為，公司既以人仔為主要資本開支，直接籌集人仔資金，可以免卻匯兌風險，而聽聞配售反應熱烈，亦反映本地投資者樂於為手持人仔找尋更多出路，相信日後會有更多以內地為主營市場嘅上市公司倣效呢個集資方法。

陸續有中企發表季績，中海油（00883）第三季度實現總淨產量8,788萬桶油當量，油氣銷售收入同比增4.7%，平均實現油價同比跌6.5%，氣價則升12.5%。公司預計今年淨產量有望超出年度產量目標，達3.35至3.45億桶油當量（首三季度總淨產量為2.48億桶油當量）。阿莊相信，其產量增長優於預期，將有助抵銷實現油價下跌嘅影響，年度業績有保證。

事實上，中海油旗下新項目陸續啟動，嚟緊只要油價維持區間上落，公司中長期盈利前景具一定嘅能見度。保守假設本年度預測盈利按年持平，現價預測市盈率8倍，估值唔係貴。站喺內地經濟見底復甦、以及商品價格易升難跌嘅角度睇，中海油都係實力之選，季內股價有條件反覆向上挑戰五十二周高位18.2元，支持位可參考250日線支持15.4元。