樓市出更：一線吉舖企硬拒短租

有數據話高檔貨品銷售大減，反映內地人消費力有減退迹象，同時一線街亦罕有出現吉舖；劉Sir以為今年一線街會重現短租舖，其中銅鑼灣怡和街三面單邊吉舖，啱啱短租咗畀人賣賀年物品，不過個新租客同劉Sir呻，今年好難搵到短租舖，呢個舖都係見到即刻租，其他地區都租唔到。有市場人士話，人民幣升值，舖位業主依然睇好後市，交吉都唔肯租畀短租客。

話就話內地人消費力有機會差咗，但係人民幣持續升值，嚟香港買嘢始終有賺，日常用品完全可以喺香港買，依家部分一線靚位街舖租金叫租升幅仍然有1倍，所以叫業主拎個舖短租都好難，當然係等大型連鎖店上門啦。

怡和街舖短租料逾70萬

劉Sir同啱啱租咗銅鑼灣怡和街1至1L號地舖嘅賀年物品店負責人吳小姐「吹水」，佢話依家搵短租舖難咗好多，今年好彩搵到上述怡和街三面單邊地舖，所以拿拿聲即刻開檔做生意，比往年早咗少少，開檔幾日，生意都算唔錯。

至於租金如何，佢笑笑口話係商業秘密，咁熟就唔好問啦。但有代理話，上址今年中每月短租過70萬元。吳小姐話，唔單銅鑼灣難搵短租，其他一線區都係無盤，公司喺旺角搵緊地舖短租賣利是封等賀年物品，代理話暫未有消息。

兆萬舖剛交吉想放長租

至於旺角一線街吉舖就發現有增加，但係業主企得好硬淨，唔多願意放盤短租，有代理報料，喺西洋菜南街一個近登打士街嘅地舖，吉咗差唔多一年，自從前租客化妝品店遷出後，業主意向月租都企硬50萬元左右，由於撞正內地經濟放緩，遊客減少消費影響，有興趣租戶都係問多，傾租少，代理話，業主暫時無意短租。

至於响個舖對面嘅兆萬中心，地下3號舖啱啱吉咗，業主發言人話，個舖屬意長租每月約37萬元，短租都可以諗諗嘅。部分業主就比較靈活，趁年尾都可以短租，永倫集團嘅尖沙咀金馬倫道2至4號地下C舖，面積1,900方呎，本來上址連同樓上1至3樓2.4萬多方呎，意向長租每月330萬元，依家可以短租地舖，租金面議。

舖壇投資者黃海明同劉Sir講，呢幾年一線地舖短租少，業主擔心租客賣平嘢，令物業市值降低，所以唔少短炒地舖嘅投資者，寧願交吉賣。