股海實戰：聯通隨時突破向上

周一港股先跌後回升，恒指高低波幅267點，收市升145點，報21,697點，成交512億元。論假前交易日，交投唔算差，亦反映喺熱錢流入之下，投資者持貨信心增強，即使假前唔想加倉，亦唔急於沽出持貨。

睇見周一市況硬淨，阿莊都膽粗粗買入本月中旬推介嘅國壽（02628）同中傳動（00658），但講明係短炒，跟炒要識得隨機應變。此外，本周一阿莊提及嘅股仔新環保能源（03989）當日復牌開市價0.38元，不久升上全日高位0.435元，收報0.385元，升幅一成，維持建議策略，即抱住播種心態先落首注，等公司業務有新消息，股價起動再加注。

中移（00941）首三季度純利同比增1.4%至933億人仔，期內淨增客戶數為4,894萬戶，3G客戶數為7,560萬戶，而ARPU與今年上半年持平，同為67元人仔。若單以第三季度計，純利同比增1%至311億人仔，較市場預期為佳，相信消息可對短期股價起支持作用。

其實論中資電訊股第三季度營運數據，大行較睇好聯通（00762）嘅表現。睇番聯通九月份3G上客淨增長317.7萬戶，乃今年以來單月最高數字。大行德銀同美林先後發報告唱好聯通，而瑞信就話，最近聯通推新數據計劃，有助進一步帶動3G數據用量，並維持給予跑贏大市評級。

睇埋股價走勢，上周五成功重上250日線樓上收市，前日繼續企穩其上，收報13.68元，升1.3%，10日線有勢抽穿250日線，屆時可進一步確立升勢。若然繼續睇好短期中資股表現，聯通值得關注，首站阻力睇15元關，支持位可參考50日線12.8元。

真明麗阻力睇2元

睇完大價股，又睇番啲細價股。前日燈飾股有鑊氣，見達進東方照明（00515）以大成交衝穿1元關，收報1.01元，升幅13%。反觀真明麗（01868）未有太大動靜，前日收報1.77元，升2.3%。自八月底來一支大陽燭後，真明麗股價喺1.5至1.8元水平上落，至今已接近兩個月。睇吓嚟緊聚唔聚到人氣，本月低位喺1.67元，主要阻力位仍然喺2元大關。