樓市出更：荷李活道老舖好難留低

近幾年中環蘇豪區已逐步擴大，而區內荷李活道依家仍有唔少古董或舊式食店等老舖，但已有唔少業主吼準機會全幢放售，租金勢必被扯高，依家地舖平均呎租徘徊100元，料唔使一年半載，個別地舖呎租可升到150元，同隔鄰擺花街睇齊。

近幾年唔少演藝名人都睇好中環二、三線街後市，喺擺花街等連環掃舖，帶動地舖租金升幅以倍數計。區內「明日之星」街道之一嘅荷李活道，依家啲舖頭仲有唔少賣緊古董及中式家具等，平均呎租約一百元，不過條街已經有唔少全幢業主放緊盤，預期未來商戶將出現大改變，租金上升，舊式老舖生存空間更難。

單邊舊樓全幢值1.6億

有代理同劉Sir講，近期荷李活道唔少業主都「心郁郁」放盤套現。高力國際甄浚岷話，今個月四號截標嘅荷李活道94號全幢，業主早喺四七年期間以兩萬五千多元購入現址，由於附近荷李活道前已婚警察宿舍將活化作「原創坊」，會吸引唔少藝術等相關行業到來，市場料是次招標物業可值7,000萬元，呎價約3.5萬元。

另有代理話，有投資者對荷李活道多幢物業有興趣，其中荷李活道60號一幢4層高、單邊舊樓，市場估計全幢市值約1.6億元，以面積約4,000方呎計，呎價大約4萬元。而租用上址地舖約六十五年嘅涼茶舖，負責人崔先生話，「舖位業主係親戚，所以租金都好相宜，無聽過業主想賣樓。依家全港舖租都貴，幾個月前租咗灣仔莊士敦道一個近港鐵站地舖，面積300方呎，月租要6萬元，呎租200元。」

已移居加拿大現回港度假嘅舊街坊Emeline話，細個喺附近住時已係該舖嘅捧場客，「舖頭擺設同裝飾好有四十年代感覺，依家喺香港好難搵到。」現時荷李活道介乎鴨巴甸街與嘉咸街一段，近半商戶係新開業嘅畫廊同新式時裝店等，其中喺度開畫廊四年嘅葉先生話，荷李活道優點係租金無皇后大道中咁貴，但鄰近蘇豪區，所以顧客唔少係中產一族。

擺花街呎租升到二百

中環一線地舖租盤唔多，商戶都密密喺周圍搵舖，代理話，依家擺花街租戶唔少都係中檔時裝及精品店，條街呎租兩年間已升到約100至200元，平均都有約150元，由於吉舖唔多，加上業主唔憂租，所以好多商戶今年初起開始喺鄰近街道搵舖，而其中較近嘅荷李活道，依家平均呎租約100元，隨着中環蘇豪區擴大，有承租能力較強嘅租戶進駐，短期內呎租唔難見到150元。