魚缸Blogger：重鋼可待回調收集
喺產能過剩同需求暴跌嘅噩夢下，無乜邊隻鋼鐵股可以獨善其身業績唔見紅，股價尋底多時，尋日終於趁升市作出反彈，其中重慶鋼鐵（01053）爆升逾兩成，以全日最高位1.23元收市，榮登升幅榜三甲，表現搶鏡。
今年以來國家一方面力谷基建刺激需求，另一方面亦積極淘汰落後產能。雖然重鋼上半年錄得虧損，但隨住下半年資產重組及營運成本下降，加埋有計劃進一步開發高需求的汽車用鋼市場，如果升級版汽車下鄉政策出台的話，重鋼將受益不淺。內地最新數據顯示鋼材的庫存量已減少，而銷售價格亦有所回升，重鋼下半年成績表未必太差，但考慮到尋日升勢幾急，可以等回調後收集，守住尋日平均價1.15元可小注跟炒，阻力睇1.4元。
重慶鋼鐵（01053）
阻力位：1.4元
支持位：1.0元