Fundman睇市：鋼股炒復甦

昨日早上公布的一堆經濟數據顯示，經過七季調整，中國經濟有逐漸站穩陣腳的迹象，加強市場對第四季經濟見底的期望。事實在逆回購操作之外，人行一直未有跟隨歐美央行採取更鬆寬的貨幣措施經已近三個月，十年一次領導人換屆在即，在通脹回落至2%安全線下，股市對人行「鬆手」營造經濟復甦氣氛的預期不斷升溫，相信這情況有利中資股延續近期的報復式反彈。

港股連升六日，沽空佔大市成交比重連續四日低於9%，反映被逼埋牆角的淡友，已開始無還擊之力，基金面對錢多貨少，近幾日所見，無論基金經理或散戶，都樂於一齊癲，趁在十八大前夕，利淡政策真空期，大玩扑傻瓜，凡見早市風吹草動，無論二、三抑或四線股，即刻見買盤蜂擁掃貨。

內地工業生產可能在第三季見底，久沉嘅鋼鐵股都開足馬力追落後，昨日呈雞犬皆升情況，最誇張嘅重鋼（01053）十年唔發市，一升就21.7%，連帶馬鋼（00323）及鞍鋼（00347）都升9.3%及6.4%。事實上，九月份內地冷及熱軋鋼價格開始反彈，儘管需求依然疲弱，但基金都炒咗至算，懶理行業今次真見底抑或假復甦。

上述三隻鋼股一二年預期市帳率分別係0.49倍、0.53倍及0.58倍，比四年歷史市帳率0.55倍、0.87倍及1.12倍，分別折讓10.9%、39.1%及48.2%，考慮到產品需求及價格，以及有足夠流通量畀基金上落車，博反彈首選應該係馬鋼。

中信資源質素佳

鋼鐵股都嫌大路，不妨諗諗中信系，表面中信泰富（00267）係因為有重組消息公布，可能出售澳門電訊兩成股權而炒高，但近年公司轉型，核心業務早已是澳洲鐵礦石生意。自QE3放水後，弱足一年的鐵礦石價格有見底迹象，即使旗下礦場距離賺大錢仲係十畫未有兩撇，但睇番現股價市帳率僅0.44倍，居然殘過近一兩年業績都見紅的國企鋼鐵股，難怪惹來一眾投機者跟風炒上。

再睇同系中信大錳（01091）及中信資源（01205），分別升11.2及5.5%。大錳上市之後，幾乎無段好睇，上半年電解錳跌價一成七，業績立即見紅，過去成交疏落，屬可炒欠穩一類，只適合大大聲細細注。反而中信資源基本因素唔錯，哈薩克油田及澳洲氧化鋁項目進入回報期，最重要係估值唔貴，昨日股價在大成交配合下，逼近八月份阻力位1.16元，升穿後見1.3至1.4元機會唔細。