股海實戰：天能上車未算遲

外圍股市隔晚持續強勢，加上內地經濟數據符預期，領導人大派定心丸，尋日兩地股市做好，滬綜指升26點，收報2,131點；恒指則報21,518點，升102點，成交增至710億元。

綜合中、美形勢，似乎喺十一月政治大事前，兩國政府會繼續致力營造利好氣氛。呢個安全期至少應該尚有兩個星期，各位要好好把握搵食機會！至於十月升市係咪已某程度預先透支末季升市、美國經濟數據持續改善會否促使聯儲局部署退市行動，下月中旬以後便會逐步明朗化。

東風向12元推進

個股方面，東風集團（00489）尋日趁升市發圍，午後一舉突破10元大關，高位做10.36元，收報10.32元，升6.6%，成交5.49億元。短線企穩10元樓上，可確認已走出中日爭端所引發嘅跌浪，目標反覆向12元推進，跌穿9.5元止蝕。

此外，呢轉電池股亦相對落後，尋日見到理士（00842）、超威（00951）同天能（00819）都有動靜，其中理士升4%，超威升1%，天能收報5.28元，升4.5%，成交6,469萬元。

要做好電池製造業務，除咗擴充產能外，積極拓展廢電池回收業務，完善產業鏈，緊跟國家節能環保政策，先至係致勝之道。天能斥資十億人仔興建嘅吳山循環經濟產業園，首期最近已開始投入試產，成為目前浙江省最大嘅廢舊電池回收廠，預期第二期將明年上半年投入試產，待項目全面達產後，每年可處理15萬噸廢舊電池及生產10萬噸再生鉛，既可降低外購原材料數量，提升毛利率。

今年上半年，天能賺3.76億人仔，同比增87%。由於公司正積極擴產，今、明兩年資本需求較大。最近旗下全資附屬天能電池集團成功發行首期本金總額4億人仔嘅短期融券，為期一年，相信有助減低配股集資嘅可能性。以現價計，今、明兩年預測市盈率才6至6.5倍，估值偏低。

尋日股價呈突破，創五十二周高，10日線確認抽穿50日線，下站阻力喺前年四月高位5.67元，升穿此位，見6元應無懸念，整固守穩4.9至5元支持區，上車有心唔怕遲！