樓市出更：鄉議局舊址拍賣價睇高

近幾個月樓價癲升，唔少之前曾經放盤嘅業主都推出物業翻叮出售，好似舊年中同今年初兩度招標求售嘅九龍塘金巴倫道47號鄉議局舊址，最近又再捲土重來，不過今次就選擇以拍賣方式出售，由於近呢幾個月，九龍塘獨立屋苑個價都升得唔錯，加上市況熾熱，相信今次賣出機會幾大。

測量師陳東岳同劉Sir講，金巴倫道47號一向有買家感興趣，今次透過拍賣方式可以加快買家入市決定，該項目佔地約12,957方呎，以地積比率0.6倍計，可建樓面約7,774方呎，將會喺十一月八日拍賣，不過，暫時仲未定到開拍價。

年初嗌逾兩億未賣出

劉Sir記得喺今年初招標嘅時候，業主意向價約2.18億元，即每方呎樓面地價約2.8萬元，據聞當時有買家好積極洽購，不過，最終因而細節上傾唔埋，所以未有成交。而近呢幾個月，九龍塘已接連有幾幢獨立洋房連地皮賣出，部分個價仲相當唔錯，好似市傳德雲道有洋房以每方呎樓面地價高達5.2萬元賣出，若果交易屬實，將創九龍塘歷史新高。

而近期賣咗嘅雅息士道雙號屋，成交價近以2.18億元，每方呎樓面地價約3.4萬元，如果以此推算，分分鐘拍賣成交價有機會高過上次意向水平。

各區洋房近期都好搶手，好似元朗區最近洋房承接力明顯加快，美聯李振宇話，葡萄薈比昂大道一幢面積2,476方呎洋房，最近以2,080萬元賣出，呎價約8,400元，原業主揸咗個單位約三年，帳面賺約400萬元。

加州系連錄5宗成交

市場又話，一買家以2,450萬元買入上水天巒加倫大道一幢洋房，以面積2,558方呎計，呎價約9,578元屬市價。

而加州花園同加州豪園，上個星期交投突然爆升，速錄約5宗洋房成交，令今個月到依家為止，成交量已經達7至8宗，相信喺換樓需求帶動之下，各區洋房成交量都會繼續上升。

九龍塘金巴倫道47號資料

物業：新九龍內地段743號

地段面積：約12,957方呎

地積比率：0.6倍

可建樓面：約7,774方呎

拍賣日期：2012年11月8日