Fundman睇市:藥股博反彈

前晚美國零售數據比預期理想,帶動三大指數做好,道指升近百點,幫助港股一個月內第二次「四連升」,尋日恒指升58點,報21,207點,主板成交回升一成一至486億元,沽空佔主板成交比例回落到8.47%,是五日新低。

早前升市領頭羊內銀股,有獲利回吐迹象,炒家轉向三、四、五線以至垃圾股身上打主意,總之有殺錯無放過。中石化(00386)夥拍新奧(02688)向中國燃氣(00384)的敵意收購計劃擱置,尋日三隻股票股價兩跌一升,中石化「晒士」咁大,買唔買到即時影響有限,意義唔大;中燃股價跌也可以理解,尤其自提出3.5元收購之後,基本上過去大半年股價得幾日低於要約出價。至於新奧不跌反升,大致可說明兩件事,一,係基金放下心頭大石,唔使再驚新奧集資;二,交易揭示了內地管道燃氣市場的山頭主義,新奧無辦法透過購併擴大規模,遲早畀其他大碼頭睇中,收歸己用。

復星(00656)捲土重來,把復星醫藥分拆上市。事實近日市場氣氛明顯改善,基金風險胃納回升,既然連有反彈無大升的航運股,都跟住波羅的海指數炒埋一份,無理由唔睇番早在一○年初醫藥改革時股價經已開始調整、跌得更耐的醫藥板塊。

博反彈有兩隻心水,先係搞到歐洲股神安東尼波頓去年英名盡喪的聯邦制藥(03933),睇中理由好簡單,一,是業務幾乎肯定在一一年經歷了最黑暗的日子,逐步復甦過來,上半年製藥利潤率開始回升,業績上半年雖急跌45%至1.7億,但已高於一一年全年水平,市場估計今、明兩年分別賺2.6億及4.3億,復甦故事可取。至於另一個重要嘅理由,就係當黑的股神早已清倉,可以睇燈做人。

四環經營情況改善

另一心水是四環醫藥(00460),公司主打藥是心腦血管處方藥安捷利、歐迪美及克林澳,上半年業績持平,賺4.61億人民幣,主要是三隻主打藥物的銷售渠道需要時間清理積壓庫存,以及克林澳的推廣開支上升影響。隨着公司第三季開始改變銷售模式,調高出廠價,以及庫存清理得七七八八,下半年情況應會開始好轉,一三年預期市盈率11.2倍,以一間未來兩年盈利平均增長11至13%的上市公司而言,估值合理,至少其復甦故事比起面前唔少博反彈升得火紅火綠的中資股吸引。早前股價低見2.8元之後拾級回升,已經重返10、20及50日線樓上,走勢轉佳,無乜博反彈心水,可以留意。

史提芬