股海實戰:越秀地產攻守兼備

港股尋日繼續呆呆滯滯,恒指又係上落百幾點,仍留喺魚缸嘅資金繼續玩碰碰車,游走於不同板塊。尋日中資股炒風吹到去大落後嘅內房股,一來樓市調控冇壞消息即係好消息,加埋有大行發報告話呢排多家內房成功發債集資,有助減低融資成本,見恒大(03333)打破沉默,一度踢上3.36元,收報3.31元,升5%;潤地(01109)、合景泰富(01813)、保利置業(00119)升幅介乎5至8%。

除咗有大行報告唱好之外,中國指數研究院數據顯示,「十.一」長假後首周各地新房成交普遍回升嘅消息,亦為內房翻炒送上東風。講到內房股,阿莊都幾鍾意隻越秀地產(00123),事關與越秀房產(00405)完成重組資產後,越秀地產可減輕負債,增加融資靈活性,趁房市調控積極物色新收購目標。上周公司便斥資十多億人仔收購廣州一地塊,相信嚟緊會繼續增購土地儲備。

積極增購土地儲備

越地今年首九個月合同銷售同比增長1.3倍,且已超過全年目標,業績有保證,而嚟緊積極增購土地儲備,亦有助拉升估值,可謂進可攻退可守。股價方面,最近升穿2元關後未見有太大回吐壓力,嚟緊股價可反覆向2.3至2.5元阻力區推進,支持位可參考50日線1.9元。

不過,若然看官自問膽生毛,可承擔較大風險,想揀啲炒味較濃嘅內房股,阿莊建議可留意翻兜幾隻被內房企業入主嘅殼股,如南聯地產(01036)、僑福(00207)、東力(00978)及星獅(00535)。

此外,組合持有嘅中國燃氣(00384),獲中石化(00386)及新奧能源(02688)聯合提購一事已終止,新奧唔使為集資頭痕,尋日升2.8%;反觀中燃,雖然與中石化達成戰略合作框架協議,但由於尚未落實詳情,暫難作評估,股價走軟。好在尋日中燃開市價仲有4.3元,開市後更曾上過4.35元,遂以均價4.29元沽出手持嘅3萬股,等再試3.9至4元水平再作考慮。

周一話過要實電力股,見提及嘅華能(00902)企穩5.5元水平,故以均價5.58元跟進5萬股短炒,午後果然有異動,收報5.71元,升2.7%,短線若能重上10日線5.74元樓上,值得憧憬!

阿莊

完成資產重組的越秀地產,財政實力提升,有利積極收購更多優質土儲。(資料圖片)