樓市出更：沙田貨尾走得最快

近期多個新盤銷售成績相當唔錯，統計上季全港多個分區共161個新盤，一手貨尾合共約6,843伙，其中多達22個分區貨尾出現下跌情況，其中以沙田區減得最快，按季減566伙；其實劉Sir都估到，事緣新世界（00017）嘅沙田溱岸8號早前賣得好，該區貨尾梗係減得快啦。

劉Sir參考代理報告發現，上季選取本港161個新盤統計，總共約56,548伙，其中已登記售出嘅單位共49,696伙，而貨尾就有6,843伙。

睇番中原報告嘅統計範圍內多個分區，就有多達22個分區貨尾單位報跌，合共減少咗1,442伙，以上述沙田區減566伙最多，遠遠拋離第二、三位嘅石硤尾及大埔區，該兩區貨尾分別按季減少189及175伙。

屯門馬鞍山貨尾激增

雖然多個地區貨尾減少，但由於上季新地（00016）屯門瓏門同恒地（00012）等烏溪沙迎海兩個大型新盤推出，令屯門及馬鞍山區貨尾激增1,066及916伙，所以上季貨尾6,843伙，佔整體單位量約12.1%，比例按季增加咗約0.5個百分點。不過，呢兩個項目近排都賣得好好，相信呢兩區貨尾單位今季會減得最快，數字會喺第四季報告反映。

以發展商表現而言，以新世界表現最好，主要受惠於溱岸8號熱銷所致，集團上季4個推售項目，貨尾單位共306伙，比起第二季大幅少咗527伙。

溱岸呎價逾萬二新高

劉Sir啱啱收到風，有內地客以2,273.4萬元購入溱岸8號2座45樓A室，單位面積1,812方呎，呎價高達12,546元，係項目嘅分層標準單位呎價新高。

溱岸8號亦緊接加推2座40及43樓A室，定價2,338.9萬及2,391.9萬元，呎價12,907及13,200元，有望再創新紀錄。