Fundman睇市：車股首選東風

上個月，中國廣義貨幣供應（M2）按年上升14.8%，創年內新高，降低了市場對經濟第四季繼續探底的疑慮，加上九月份CPI一如市場預期，回到2%以下，距離中央召開十八大會議尚有一個月，通脹回落，意味人行有更大的靈活性，揀啱時間再推寬鬆貨幣政策，使九月初至今累積升幅唔少的港股，呈現超強的反地心吸力，恒指收市升11點，報21,148點，即月期指報21,106點，低水42點，主板成交額縮減至439億，比上周五少兩成一，好淡雙方擺出敵不動我不動姿態。

資金氾濫，本港樓市愈升愈有，睇報紙見九龍灣四百呎小單位，一年唔夠由170萬升至270萬，賣家即使畀SSD都在所不計，十足十股市升浪尾水，投機者由一二線轉炒四五線股，禾雀亂飛格局。

史提芬早前陪賓架老友睇樓，親身感受到，即使有樓在手，個市咁升法同樣煩惱。老友一家大細，因為想接父母由外國回港同住，故打算由現時千呎港島單位搬至千六七呎。第一個面對煩惱，是呎數愈大，呎價不成正比咁增加的問題，為額外五成居住面積，計落幾乎是手上物業雙倍價錢，考慮到銀行按揭指引，大銀碼按揭收緊到得五成以下，加埋4.25%印花稅，拎唔出樓價六成真係唔使諗。

近期個市跌唔落，主因係唔少大孖沙賭十八大前，為營造良好氣氛，中央好有可能推提振經濟措施，尋寶熱使到個別嚴重落後板塊，出現輪流炒的情況。不過，與其亂石投林，要賭真銀，筆者認為仲係選基本因素較佳的行業，汽車股是唔錯的炒落後選擇，當中又以東風（00489）最啱心水。

盈利風險已反映

受反日浪潮影響，東風股價自五月初的15.4元跌至早前最低8.54元，跌幅達四成五。即使以年初計，股價累積跌幅25.7%，比當炒的吉汽（00175）及華晨（01114）同期的91.1%與7.4%升幅，跑輸十幾條街。形勢比人強，或者短期難以進行大規模促銷及宣傳活動，負面影響會在下半年浮現，不過以預期市盈率6.7倍，較行業平均的9.5倍折讓29.5%，相信已充分反映下半年盈利下調的風險。

博反彈首要是人棄我取，政治因素或者影響東風一時，但過往公司的表現，可以預料在不久之後可東山再起。近日股價在低位見成交回升，估計醒目錢已開始進駐，今年六、七月兩次受制於50日線（現時在10.05元）回落，若短期能夠升穿這度阻力位，大落後的東風有條件見11至12元之間。