股海實戰:國壽爆發力不容忽視

內地九月份CPI數字符預期,但PPI則創三十五個月新低,反映工業生產環節仍然疲弱。畢竟經濟復甦難一步登天,通脹持續受控已算係好事,至少嚟緊中央考慮再推刺激經濟措施時可以少一瓣顧慮,至於經濟復甦動力是否正在增強,就要睇埋本周四公布嘅季度GDP及九月份社會消費品零售總額等數據。

恒指尋日上下波幅得一百點多啲,埋單升11點,收報21,148點,一場悶局。炒家積極發掘不同板塊炒作,尋日輪到潔淨能源設備股,如安東油服(03337)、海隆(01623)、華油(01251)及宏華(00196),升幅介乎6至11%,但阿莊總覺得呢啲股炒風短癮,即市跟炒冇妨,隔日作出嘅炒作策略建議則未必合用。

此外,尋日另一隻市場焦點股,乃股價急挫逾15%嘅中興(00763),皆因公司發季度盈警,股價一度被質低至10.38元,收報10.56元,成交7.08億元。反觀喺家電股中表現一直相對落後嘅海信科龍(00921),尋日就憑着發季度盈喜而一洗頹風,曾高見1.94元,收報1.83元,升17%。老實講,散戶難以預知企業盈警盈喜,知道嘅時候股價往往已大起大落,即市跟炒要量力而為,好似隻中興,相信沽壓未完,咪心急撈底。

運動用品股齊腳軟

體育用品股李寧(02331)又有高層人士變動,尋日仲停埋牌。照計私募基金TPG合夥人早前空降後,調整公司高管班子唔出奇,至於停牌係咪同抽水有關,就要等着瞧。龍頭股動向未明,其他同類股亦發軟蹄,安踏(02020)、特步(01368)、中國動向(03818)股價跌2至6%。

好耐冇睇過內險股,見中國人壽(02628)由六月份低位17元,反覆回升至尋日高位見23.4元,累升幅度達37.6%,表現明顯跑贏滬綜指,亦跑贏國指表現,係近年難得嘅強勢。

國壽股價得以擺脫估值低迷嘅歲月,重拾正軌,皆因近年管理層積極改善資產負債表及優化產品結構,經營策略漸見成效,八月份單月保費收入260億元人仔,同比增長近兩成,跑贏同業。若然下月十八大後中央一如市場預期推新一輪刺激經濟措施,A股確認回升之勢,則近半年積極喺低位加倉A股投資嘅國壽,股價爆發力不容忽視。

過去一年國壽股價喺17元成功構建平台支持,尋日平收報23.25元。短期主要阻力仍喺25元,月內回吐喺22至23元水平可分注收集,250日線支持喺20.8元。

阿莊

國壽優化產品結構策略漸見成績,加上手頭A股投資水漲船高,股價強勢有支持。(資料圖片)