大市尋日窄幅上落，恒指埋單升11點，以21,148點收市，由於磨咗咁耐先至突破到21,000點，睇怕都唔會咁易掟番落去，反而一旦有好消息嘅話，個市隨時挾多浸，所以家陣做淡都未係時候。頁岩氣概念股尋日紛紛炒上，但係頁岩氣開採似乎十畫都未有一撇，加上升咗咁多，家陣先至再追入似乎風險唔細，真係要諗清楚。
