樓市出更:商廈拍賣攞晒彩

住宅樓價走高,相對「低水」的工商樓成目標,中國銀行廣東開平支行前行長許超凡等涉挪用公款,被法院「翻叮」出售嘅尖沙咀新東海商業中心低層兩伙,被搶高逾一成以2,191萬元拍出。

長沙灣工貿物業環薈中心亦有一個高層單位下個禮拜推出拍賣,呎價只5,000元,低市價一成半。

「翻叮」再拍嘅新東海商業中心低層3及4室,實用面積共1,825方呎,連約開價1,971萬元,比去年開價低約3.5%,吸引4至5組客到場爭奪,經過13口承價,終以2,191萬元成交,呎價達1.2萬元,按每月租金近4.2萬元計,租金回報約2.3厘。

環薈叫低15%下周拍

拍賣行負責人鄭世傑同劉Sir講,新東海個價比預期高出5%,幾滿意拍賣成績,估計新買家收住租先,遲吓可能自用。不過尋日拍賣嘅7項住宅,全部未到價收番,佢話唔少業主覺得市場需求強勁,於是開價「好進取」,搞到承接力麻麻。

不過唔受額外印花稅影響嘅工商物業,一般只要業主開價平少少,已經可以「好搶手」。鄭氏話,下周初以390萬元開拍嘅環薈中心高層單位,面積大約779方呎,比市價低咗約15%,已經吸引好多客戶主動查詢,相信到時反應唔錯。

東涌農地物業嗌80萬

鄰近機場位置嘅東涌農地物業下周同場推出,佔地共約10,890方呎,拍賣開價只80萬元,每方呎僅約73.5元。

除咗上述新東海商業中心低層戶,原定同場拍賣,亦屬許超凡等被法院下令出售抵債嘅兩項物業,包括沙田樂怡小築第4座低層連車位,同埋銀禧花園單號車位,因涉及文件問題而改期再拍,兩物業原開價分別1,318.5萬及45萬元。

劉Sir

昨日於拍賣會上減價「翻叮」的新東海商業中心低層兩伙,獲搶高逾一成拍出。

尖沙咀新東海商業中心