樓市出更：元朗旺朗屏站有得鬥

今日係西鐵元朗朗屏站（北）限呎項目截標嘅日子，雖然項目「謝絕」特色戶，只可劃一提供標準單位，但美國推出第三輪量化寬鬆（QE3）等利好因素下，相信反應唔會差得去邊；好似早前投得區內首個限呎盤嘅長實（00001），講明會入標，有測量師仲估計標書數目有8份或以上，目前項目最高估值約19億元。

朗屏站（北）限呎項目上月截收意向書時反應已經唔錯，總共收到16份意向書，包括長實、新地（00016）、恒地（00012）、恒隆地產（00101）及嘉華國際（00173）等都有份遞交意向書。

中小型戶佔項目75%

為免項目被「豪宅化」，項目提供不少於832個單位，當中有約75%單位實用面積唔可以多過538方呎，仲要依據「可持續建築設計指引」發展，唔單止咁，項目仲要按照基本、簡約原則設計，對發展商嚟講，最「辣」嘅條款係唔能夠提供複式、Penthouse等特色單位。

不過，上述規限似乎未有影響發展商競投意欲，長實執行董事趙國雄同劉Sir講，集團在區內亦有限呎項目，今日會入標競投朗屏站（北）項目，並相信競爭激烈；新地副董事總經理雷霆昨表示，今日會獨資入標競投朗屏站（北）；而會德豐地產常務董事黃光耀亦話，集團好大機會遞交標書，由於項目規模唔大，未考慮以合組財團形式競投。

儘管市場憂慮「限級」會令項目價值大打折扣，但有測量師就認為影響未至於咁嚴重，高緯環球張翹楚同劉Sir講，就算朗屏站（北）限呎項目未能提供特色戶，但QE3對市場嘅正面幫助唔少，就足以抵銷有關限制嘅不利因素。

地皮估值最高19億

佢仲話，估計項目最終會收到8份或者以上數目嘅標書，但考慮到項目位置鄰近東頭工業區，所以維持估計每方呎樓面地價約3,200元，市值約16.77億元，略低於去年批出嘅前元朗邨限呎地。而市場估值則介乎約15.72億至約19億元，樓面地價約3,000至3,600元。