股海實戰：中傳動走出谷底

匯金增持四大內銀，並表明未來一年會繼續增持，加上三桶油（00857、00883及00386）靠穩，足以抵銷本地地產股偏軟嘅影響。國指企穩一萬點關，收報10,231點，升190點；恒指亦先跌後回升，收報20,999點，升79點，雖未能重上21,000點，但對比外圍表現，足見市底偏強。

從國家隊出手及表態，可確認十八大前中央正落實各項維穩工作，呢一點使得「股災月」行情出現了變數。站喺十一月中、美政局大事前，兩地政府維穩意願強烈嘅角度出發，唔排除好友會打蛇隨棍上，若大市成交現突破，月內上試今年高位21,760點嘅可能性不能抹煞。

中建材大戶壓價收貨

綜觀各中資股板塊，水泥股有追落後條件。尋日龍頭股海螺（00914）已率先起動，股價創五月初以來收市新高，短線可順勢𥄫實中國建材（03323），尋日喺8.55至8.56元有大型沽盤攔住，似乎係大戶未收夠籌，策略可喺8.4至8.5元水平跟進，上望250日線9.1元，跌穿8.2元止蝕。

呢期鐵路股表現突出，事關鐵道部年內第三次追加投資額，最新嘅投資規模為6,300億人仔，以今年首九個月鐵路固定資產投資為3,441億人仔計算，意味末季投資接近前三季總額，為鐵路基建板塊帶來有力支持，相關概念股中鐵建（01186）及中鐵（00390）可以望多兩眼。

除咗呢啲打正名堂做鐵路運輸基建業務嘅股份之外，周邊產業股似乎亦開始受到利好氣氛感染。就如兼營高速機車、城市輕軌機車傳動設備嘅中國高速傳動（00658）股價亦受追捧，尋日曾高見2.68元，收報2.67元，升6.3%。

目前，中傳動嘅高速機車、地鐵和城市輕軌傳動設備產品，已應用於北京、上海、南京及深圳等嘅地鐵，今年上半年該項業務銷售收入為5,296萬元，同比增幅超過兩倍，相信未來可受惠鐵路投資提速增長，並抵銷風電相關業務放緩嘅影響。

論股價走勢，經歷兩年多嘅大跌浪，如今正處於低谷，尋日成交股數乃今年二月十日以來單日最多，14日RSI升勢轉強，10日線有勢抽穿50日線，短期主要阻力區喺2.8至3元，支持位喺2.42元。