樓市出更：商廈辣慶摸王也換貨

QE3措施令全港物業市場亢奮起來，連近年鮮有出手嘅「摸王」黎汝遠（黎Sir）都忍唔住，啱啱斥約452萬元，向投資者黃海明接摸購入灣仔金威商業大廈中層單位，呎價過9,000元；同時，黎Sir亦「摸出」持有嘅灣仔甲級寫字樓單位，五個月左右帳面淨袋425萬元。

全城熱爆QE3果然厲害，呢幾年鮮有入貨嘅黎Sir都趕入市。中原蔡德寶同劉Sir講，投資者黃海明尋日分拆摸售嘅金威商業大廈全幢，率先賣4至23樓共20個單位，一日內全部沽清，套現9,020萬元，其中中層有個500幾方呎單位買家就係黎Sir，呎價大約9,000元左右。

速賺425萬即換入金威

另外，香港置業鄭家永（Leo）又話，黎Sir以約4,252萬元摸出灣仔東亞銀行港灣中心10樓05室，呎價約1.5萬元，五個月帳面速賺425萬元，賺幅約11%，淨賺舊錢差唔多夠一次付清上述金威商廈個單位。

Leo仲話，紀惠集團廖偉麟兩年前購入嘅金鐘力寶中心2座12樓全層，依家拆售04B室，涉資約2,083萬元，呎價約1.81萬元，較購入價高近20%。

荃灣舖仔呎價過十萬

有代理話，荃灣南豐中心1樓有個找換店租用舖仔，剛以2,260萬元沽，呎價過10萬元，係近年罕見。另據土地註冊處資料，油麻地彌敦道484號鴻星大廈地下連閣樓，同隔籬486至488號益南華廈1樓A至C室，共錄臨時買賣登記1.68億元。

唔少業主都趁市旺放貨，美聯旺舖伍賢明話，喺灣仔合和中心二期項目附近嘅皇后大道東63至65號一幢商住樓，業主依家以4億元放售，呎價約3.3萬元，據悉，業主三年前以1.5億元購入，即依家叫價高逾1.6倍。

外資基金紛紛出貨，喺本港持有上環嘉匯商業中心全幢、荃灣豪華廣場商業項目等三項物業嘅鵬里集團，尋日委託中原放售葵涌永得利廣場其中3層樓面，涉約6.8萬方呎，意向呎價逾3,800元。

鵬里與安祖高頓亞洲共同持有項目約56萬方呎樓面，各佔約50%，亦係佢哋喺本港首個共同投資項目，若全數賣出，涉及金額超過20億元。