魚缸Blogger：東風搭轉順風車
國指尋日重返一萬大關，但恒指繼續喺高位整固，跌17點收市。隨住美國鋁業前晚公布季績，港股亦好快進入業績期，希望可以為後市帶嚟方向。
缺乏炒作主題之下，尋日車股借「汽車下鄉」嘅消息踩油殺上，東風（00489）更加升近5%，鑊氣似乎唔錯。東風由於屬日資概念股，近兩個月已經畀淡友沽到體無完膚，股價高低位最多唔見兩成七，但頹如中興通訊（00763）都已經報復式反彈，加上空軍始終要食胡離場，沽咗咁耐點都要啲時間補番貨。而且東風母公司係祖國嘅十大車企，爛船都有三斤釘，既然尋日股價上番20日線樓上，14日RSI都係得51，不妨小注怡情搭轉順風車。
東風集團（00489）
阻力位：10.2元
支持位： 9.3元