Fundman睇市：中興捧得過

好嘅唔靈醜嘅靈，美股真係踏入第三季業績期就走樣，前晚公布業績的美國鋁業，連同一次過重組開支蝕1.43億美元，雖然少過市場預期，可是管理層下調全年全球鋁消費需求預測，股市氣氛受影響，加埋國基會（IMF）調低全球經濟增長預測，結果華爾街三大指數見紅。精神分裂的港股，尋日先以低開回應歐美股市跌幅，但匯金入市增持四大行的消息，繼續支持A股由跌轉升，恒指在三大內銀股帶動下，從谷低20,767點逐漸收復失地，收市指數跌幅收窄至17點，報20,919點。

三隻心水化工股，四日升近兩成的理文化工（00746）見回吐，跌2.7%報4.2元；東岳（00189）成交配合下，再現大陽燭升4.2%報3.9元，短期相信有機會試4.1至4.25元之間阻力；上半年業績確認見底的葉氏（00408），或者真係貨疏得滯，未能惹起炒家胃口，昨日見過近一個月低位，如果唔怕輸機會成本，現水平可以逐少儲貨。

中興（00763）連跌兩日後，尋日股價報復式反彈5.8%，以12.6元報收。美國眾議院指中興及華為威脅國家安全，大行估計可能禁止兩間公司向美國電訊項目供應器材。事情實在巧合得誇張，內地電訊設備一哥華為，公司老總近排四處為上市籌謀，見基金經理及傳媒，講明將華爾街視為第一上市目標，美國眾議院突然話內地電訊設備公司帶來威脅，事件看來政治味道高於一切。

留意到分析員對事件普遍反應中性，美銀美林認為中興在美國銷售收入極奀，警告也未涉及中興主打的移動電話業務，影響唔大。亦有大行反而着眼於內地三大電訊商啟動4G設備投資帶來的好處，看來調整過後，中興仲係值得捧場。

神華估值仍吸引

中國煤炭價格上半年插水式調整超過兩成，近期有企穩迹象，全國最大煤炭進出口港秦皇島公布煤庫存回落至4個月以來新低，推動尋日幾隻煤股反彈。其實煤價止跌，客觀及主觀因素俱備，一來中國北部地區天氣轉冷，煤炭需求周期性地回升。另一方面，近期市場都關注下月召開的十八大，相信中央振興經濟措施將在會期前後陸續曝光，推動煤炭需求及價格。

筆者推介過的神華（01088），股價比其他煤股更早見底，由六月低位24.15元，至今回升28%，但這中國煤業一哥，估值都係10倍左右，在上述因素支持下，相信有力挑戰34至35元水平。