股海實戰：馬鋼有條件追落後

港股尋日以整固為主，恒指一度跌穿20,800點，尾市略為回順，收報20,919點，跌17點，成交442億元。反觀國指表現較佳，收報10,041點，乃自五月中以來首次企穩喺一萬點樓上收市，主要受汽車股升勢帶動。不過，阿莊相信短期港股維持喺高位震盪整理嘅機會較大，再大幅上升嘅動力尚嫌不足。

講到汽車股，為求刺激經濟，催谷消費，傳聞中央又再醞釀推新一輪汽車下鄉政策，或將於短期內出台，消息刺激汽車股做好，其中東風（00489）、比亞迪（01211）、廣汽（02238）及吉利（00175）升幅介乎3至4%。

汽車下鄉效力成疑

阿莊認為，呢幾年汽車行業喺補貼政策支持下得以保持增長，但正正由於過去幾年汽車銷量持續高企，畢竟汽車係耐用品，如今再加大力度推動汽車消費，政策效力可能不如前，且有機會造成其他問題，如交通擠塞及廢棄車輛回收處理等。總之針冇兩頭利，相信制訂政策者亦心中有數，只係同家電業一樣，汽車業養活不少勞動人口，藉補貼政策穩定就業市場嘅策略意義也許大於一切。

其他國策概念股亦見異動，消息指中移啟動4G設備採購，刺激中興（00763）、中國無線（02369）及晨訊（02000）等電訊設備股上揚。此外，鋼鐵股鞍鋼（00347）及馬鋼（00323）同升逾4%，重鋼（01053）亦升3%。近期鋼價確實持續回升，庫存下降，相信與踏入末季交易商增補庫存有關，相比之下，本輪鋼鐵股反彈幅度尚算溫和，現水平跟進追落後有心唔怕遲。

論估值，馬鋼現價市帳率僅0.44倍，已頗大程度反映行業處下跌周期對盈利表現嘅影響。隨着中央加大力度投入各項大型基建，並增加鐵路投資規模，有望引領鋼鐵行業逐步走出低谷。近年馬鋼不斷優化產品結構，特別係車輪鋼和車軸鋼成功生產，已具備批量生產嘅條件，而喺汽車板、管線鋼等產品生產亦取得突破，相信喺迎來嘅行業復甦周期中，馬鋼憑着調整產品結構嘅成果，表現可跑贏同業。

再睇股價走勢，第三季其股價尋底，基本上守穩去年十月低位1.4元水平，之後反覆回揚，尋日逆市上升，成交放量。若市況配合，回升勢態可持續，下兩個阻力位分別喺250日線2.15元及四月初高位2.51元，10日及50日線支持分別喺1.85元及1.78元。