樓市出更：摸舖旺價唔旺市

美國推出QE3後，本港物業市場掀起炒風，不過，好多炒家都心雄加價放售摸貨，反而令商舖市場「旺財未旺市」。資料顯示，上個月商舖「摸貨」成交只有約21宗，按月少逾20%。

資深投資者李冠亮話，一線零售區商舖做價貴，反而二線街商舖邊際利潤較吸引，故依家日日落區尋寶。劉Sir收到美聯旺舖同其他行嘅資料，本來九月上旬商舖摸貨量升至逾15宗，但隨着美國推出QE3後，熱錢湧入，唔少炒家都即刻加價，加幅達10至15%，買家都話要諗諗。

旺角舖一周加價逾6%

例如灣仔大王東街雙號地下及低層部分，面積共約3,400方呎，業主上月初以逾5,000萬元購入，上月中開價約6,800萬元放摸貨，現調高意向價至約7,500萬元，加幅逾10%。另旺角登打士街42號A地下部分亦調高意向價至約5,200萬元，一周內加價逾6%。

所以上個月埋單商舖只有約21宗摸貨，佔整體比例亦降至約5.4%，按月少1.3個百分點。投資者李冠亮認為，銅鑼灣及旺角等一線區地舖叫價高、買賣流通量低，反而二線街舖短炒利潤會更高。

另外，資深投資者黃海明話，月前斥逾1.7億元向「舖王」鄧成波購入的灣仔金威商業大廈全幢，依家先以摸貨形式拆售樓上20層寫字樓，意向呎價7,800元。

近年積極搞物業發展嘅大鴻輝興業亦入市工貿物業，該公司主席梁紹鴻同劉Sir講，葵涌永得利廣場屬區內罕有工貿用物業，加上收租回報高，有興趣同基金洽購幾層，初步先傾7層，涉資起碼5億元。

大道中全幢6億沽出

土地註冊處資料顯示，皇后大道中53號（喺卡佛大廈對面）全幢以6.06億元售出，據悉，呎價逾6.2萬元，有機會創全幢商業新高，買家為都豐有限公司，公司註冊處資料睇到，該公司董事為劉耀新。

另上環中遠大廈33樓錄臨時買賣登記4.8億元，聽講呎價達2.34萬元，係該廈呎價新高，單位樓價三年升逾2.2億元。