魚缸Blogger：中國龍工強勢開車
A股尋日發威抽升近2%，但港股跟咗一段之後明顯力不從心，尾市升幅唔見一半，高位更加開咗粒「射擊之星」，後市爆上定炒落，似乎仲係五五波。
沉寂咗一輪嘅機械工程股又再炒落後，要喺中聯重科（01157）同中國龍工（03339）二揀一嘅話，暴炒男較睇好PE三倍唔夠嘅龍工。炒機械股，主題離唔開行業第四季復甦同阿爺加大力度刺激基建，而且祖國九月製造業PMI近五個月首次回升至49.8，顯示內地經濟有築底迹象，所以龍工今季嘅挖掘機、輪式裝載機等銷售亦好大機會回升。股價上，龍工尋日稍為突破平頂三角形阻力兼抽穿保力加通道頂部，似乎一副開車格已經形成。
中國龍工（03339）
阻力位：1.65元
支持位：1.37元