Fundman睇市：零售股掂唔過

尋日A股在匯金托市消息下，一口氣抽高2%收2,115點，可惜對港股於事無補，恒指早市最多升268點，收市前升幅收窄到得番112點，報收20,937點，令唔少缸邊客失望。港股升勢基本集中在工行（01398）、中石化（00386）、中石油（00857）、中移（00941）及建行（00939），共貢獻73點，佔大市升幅六成五。

基金經理買港股的態度審慎，相信同美國鋁業昨晚揭開美股第三季業績期序幕，不無關係。自從○八年次按風暴，聯儲局減息兼狂印銀紙，融資成本大減加上弱美元刺激出口，美國上市公司業績經歷連續十一個季度增長。可是，放水的進補作用有遞減效應，分析員估今年第三季，標普五百指數成分股業績，平均會出現2.7%倒退，是海嘯後最差。

華爾街如何解讀本季業績，有待觀察，可是睇見美股在QE3後的sell on fact現象，股市升幅唔多，油價在需求疲弱下急挫，筆者多少有點擔心，一旦年底輪到美股強轉弱，即使A股十八大前有中央力托，夾在兩市之間，港股仲係好難叻得去邊。

黃金周前七日，內地54個城市合計簽約樓盤1.6萬套，比前一星期大跌七成。今年「金九銀十」失效，內地銀行未有高調收緊信貸條件，但準買家已怯於經濟不明朗因素，十八大房產政策明朗化前，內房股相信都會繼續向下搵支持。另外，中國商務部發表中秋加「十．一」長假期，全國餐飲、零售企業銷售額8,006億元人民幣，比去年增長15%，考慮到今年長假期比去年多一日，以及目前內地零售股的估值，顯然銷售增幅未能令投資者感到安心。

銀泰盈測或遭下調

百貨股銀泰（01833）於黃金周期間兩杭州店的銷售下跌8.7%，股價尋日急跌8.1%，報8.21元，下星期管理層公布第三季營運數據及第四季度指引，屆時相信分析員都會有興趣，試一試百貨業水溫。回顧上半年，銀泰盈利增長13.7%，至5.47億元（人民幣．下同），分析員預測下半年賺3.78億，按年升11.1%唔算進取，但以今次黃金周表現，似乎仲係有被下調的可能，即使明年PE12至13倍唔算貴，可惜內需疲態持續下，短期吸引力不足，基金博反彈相信寧取工業及資源股。

百貨零售股風險同回報不成正比的睇法，同時適用於另外幾隻估值較高、第四季營運表現可能未達標的股份。金鷹（03308）及百麗（01880）昨日均見在成交增加下沽壓沉重，暫時仲係避免沾手為妙。