股海實戰：中石化向8元關推進

傳聞國務院及中證監聯手出台針對上市公司及央企嘅新政策，以解決股市低迷嘅問題，滬綜指尋日重上2,100點關，收報2,115點，升近2%。恒指乘勢反攻，一度重上21,000點關，惟尾市現獲利回吐，收報20,937點，升112點，成交509億元。

秦皇島港煤庫存下降，顯示喺冬季煤炭需求高峰到臨前，煤價有望逐步回穩。中國神華（01088）股價尋日一度高見31.05元，收報30.6元，升1.6%，目前主要阻力位仍喺250日線31.9元，50日線承接則喺29.6元。中煤（01898）及兗煤（01171）同升1%，成交亦有所增加。一旦神華股價衝穿牛熊分界線，可追入相對落後嘅中煤及兗煤。

內銀有潛在風險

上周內地長假，跟唔少內地朋友見面，傾談間發現唔少做廠嘅表叔冇早幾年咁大口氣，態度務實多了，皆因近兩年生意一日比一日難做。聽佢地講，依家索性將部分資金放喺銀行做理財，回報至少都有五、六厘。但阿莊喺度諗，內銀為咗吸錢，大量發行理財產品，難免令行業風險增加。若趨勢持續，勢必增加內銀板塊風險，故短線炒上落尚可，中長線仍須審慎。

尋日中石化（00386）表現突出，股價升3.8%，成交股數達1.87億股，創今年以來第二大單日成交股數，主要係受新成品油調價機制嘅利好消息刺激。內地傳媒引述發改委消息指，新成品油定價機制與原有方法變化不大，主要係會縮短調價周期，加快調價頻率。事實上，成品油需求增長按年增加，調價機制進一步與國際接軌，加快市場化，有助減少資源浪費及投機風險。

究竟近日石化股強勢係市場對政策因素憧憬過大，抑或市場定價機制確有突破性嘅發展，要拭目以待。純睇股價走勢，中石化尋日成功突破7.5元阻力位，14日RSI處於70，尚未算極之超買，短線若能守穩7.5元樓上，可反覆向8元關推進，10日、20日及50日線支持匯集喺7.2元水平，未宜有失。