樓市出更：怡和街貴兩倍保靚位新舖王呎租四千

內地旅客來港掃高價貨有減少迹象，不過對特色小食同化妝品等日常用品需求就有增無減，聽講銅鑼灣怡和街有間特色食品店舖頭，啱啱以每月約120萬元預先續租，同依家租金大升差唔多兩倍，以建築面積計，呎租達4,000元，成為全港呎租新舖王。計番條數，即是舖頭每日最少要做4萬元，至交得起租金。

近排內地豪客來港買高檔手錶確實少咗，不過，佢哋對日用品或者特色食品仍然好支持，所以唔少喺一線街賣特色食品嘅商戶都話，貴租唔緊要，最緊要有客。有代理同劉Sir講，喺銅鑼灣怡和街近港鐵站有間特色食品店，租咗上址好幾年，依家月租約40萬元。

先達小食舖嗌億三

自希慎廣場早前開幕後，銅鑼灣人流激增，上址生意更加做都做唔切，雖然租期出年年初先到期，聽講租客計過數，認為生意前景好，可以看高一線，早前拍板以每月約120萬元續租，以舖頭建築面積300方呎計，呎租達4,000元；比同區景隆街雙號找換店蚊型「舖王」呎租3,600元，每方呎仲要多400元，高出幅度超過11%，成為新「舖王」。

地道小吃利潤高，所以唔少畀得起租嘅租戶都係賣小吃，有個靚租客，業主自然唔憂賣，個別更趁市旺反價。

其中，旺角先達廣場G2至G3號一個單邊地舖，租客係賣小食，今年年中業主連約叫價1.1億元放盤，呎價高達47萬元，貴絕旺角，依家業主將叫價加到1.3億元，加幅逾18%，呎價將會超過55萬元，有機會成為九龍舖王。

投資者擬10億入貨

商舖租售價跑贏大市，劉Sir有個喺銀行工作超過三十年老友葉耀昌（Anthony），舊年決定請辭，同幾個朋友成立公司投資舖位，先後共斥約3億元購入11個舖，迄今已售出6個，帳面賺咗2,300萬元，佢話諗住今年底前再斥3億元入市，出年可能豪擲10億元。

睇番差估署資料，中區甲級寫字樓租金大上大落，呎租連跌兩個月，今年八月份錄得只約93元，按月跌5.5%，期內租金指數報196.6點，按月跌1.5%。

另一方面，發展商都唔執輸，近期積極買商舖，好似市建局等發展嘅西環縉城峰重建項目，根據土地註冊處資料，其中商場部分連一批車位售出，涉資大約2.2億元，買家係WEALTHY STATE INVESTMENTS LIMITED，公司註冊處顯示，該公司董事包括何述勤，與嘉里建設（00683）一位執行董事姓名相同。