Fundman睇市：化工股秤先

個個睇住A股黃金周假期番嚟，順利開紅，結果再通地眼鏡碎。滬綜指尋日威得二十分鐘後轉升為跌，單係睇人民幣銀行同業拆借頭寸之緊，已知不妙，一星期拆息抽升0.625厘去到3.812厘的接近一個月高位，十八大前即使人行繼續逆回購，但股市已開始麻木，惟有寄望實質刺激政策出台，扭轉市場氣氛。昨日港股跌187點，收報20,824點。樂觀睇，主板成交縮水到433億的六日最低，反映市底沽壓未算大，只不過近期港股升幅唔細，好友趁機鎖定既得利潤而已。

內房首選潤地中海

藍籌中，最肉酸要數內房孖寶華潤置地（01109）及中國海外（00688），分別跌3.3%及3%。以往黃金周前後是內地賣樓旺季，有「金九銀十」的稱號，今年四十一個內地主要城市，九月銷售數字意外跌6%，有旺季不旺的情況。講句公道話，九月底為止潤地及中海已分別完成全年銷售目標的96%及92%，屬同業中至標青，衰就衰在估值較高（資產折讓較少），大孖沙迫於無奈搵佢地開刀，跌穩之後，筆者認為兩者依然是內房中首選。

早兩星期，瑞銀唱好體育用品股，掀起一陣炒風，尋日佢又發功，大堆頭出份64頁報告唱好幾隻本地中型工業股，首選建滔化工（00148）、其他還包括偉易達（00303）、德昌（00179）、創科（00669）、建滔積層板（01888），結果建滔化工股價升7%。的確，近期留意到愈來愈多分析員開始睇番好工業股，由部份管理層透露，經過七、八月之後，第三季尾第四季初，接單情況有所改善，由改善中的官方及滙豐編制採購經理人指數（PMI），也證實這個共識應該係雖不中亦不遠矣。

工業股今浪極為落後，連航運股都炒埋，成為下一波尋寶熱受惠者絕對唔出奇。經營化工產品及電子積層板的建滔被睇中，相信同市帳率0.6倍唔算高、且市值夠大基金容易買到貨有關。近個多月，隨着需求見底，化工產品價格也開始回升，最有利仲係美國推QE3後，金銀銅價高位徘徊，唯獨油價由近100美元回到88美元，有助紓緩化工業成本。

考慮到業績在第三、四季見底，市值有番咁上下，一三年預期市盈率又唔貴的，筆者有三隻心水，包括從事氟化工的理文化工（00746）及東岳（00189），以及專攻溶劑及塗料的葉氏（00408），昨日見理文以大成交升穿低位橫行區，短炒的可優先考慮，東岳及葉氏則可留意成交配合再上車。