股海實戰：思捷現價具值博率

期望愈大，失望愈大，當大家以為復戰的內地股市會開紅盤的時候，就來了個反高潮，滬綜指全日跌11點，市場氣氛麻麻，有指是跟本月將有高達千億元的股票解禁有關。港股略為低開33點後，反覆偏軟，午後跌幅擴大，收市跌187點。

港股上周兩次上穿二萬一關，結果都係保唔住，會否出現雙頂壓力，言之尚早，因昨日主板成交433億元，按日跌4%，跌市成交無增加，沽壓唔算大。十月份每多被視為股災月，因過去的一九八七、一九九七及二○○八的十月份曾發生股災。不過，再細心睇，三十年來十月份只有八次跌市，另外的二十二次都錄得升幅，何況以往股災發生時恒指正處於高處不勝寒的位置，反觀目前仍在二萬一邊緣掙扎，估計在十八大前，維穩至上，維持上落市的機會更高。

中興調整暫觀望

近期走勢對辦的電訊設備股，因有指中興通訊（00763）及華為在美國被指涉及間諜活動，消息令中興昨日急挫近6%收市。單純論股，華為及中興憑着成本優勢，近年打低發達國家的對手，成功取得不少第三世界國家的建設訂單，引來對手眼紅已是行內皆知。中興九月初由9.23元彈到上周的13.5元，都係時候要調整，暫宜觀望。

舖位炒到瘋，有人同筆者講一個港島三四線區的蚊型鋪，一百呎都無，都叫緊成千萬，做零售小生意面對加租壓力，個個嗌救命。話口未完，本港七、八月零售總額只按年增3.9%及4.5%，扣埋通脹，所剩無幾。最新「十一」黃金周訪港旅客實際只有10至15%增幅，遠低於預期的兩成，零售股當堂「謝晒」，六福（00590）急挫7.8%，又可以睇少瓣。

昨日有睇頭的是出口品牌股，創科（00669）有大行唱好，勁升近4%，利豐（00494）企穩。思捷（00330）明顯落後，因公司本身正經歷業務重整兼管理層的轉型期，早前其新任總裁見投行，摩通立即出個正面報告，股價係咁意彈些少，大家對其後市依然審慎，因specific risk唔低。不過，思捷多次跌穿10元後都彈番上嚟，公司換上新舵手，其評論又確是觸及癢處，只要佢坐得穩，十二、三蚊有一定值博率。