Fundman睇市：短炒航運股

美國總統奧巴馬雖然上星期第一場選舉辯論，民意先輸一比零，不過剛公布的美國九月份就業數據，非農就業職位增加11.4萬份，失業率更由八月份的8.1%回落到7.8%。迷信友話，以往總統選舉前凡失業率高於8%，尋求連任者必敗！

客觀而言，就業數據改善，顯然並唔係因為美國新職位增長，而係長期失業人士退出就業人口所致，但俗語有云成王敗寇，或者真係個天都唔畀奧巴馬加入卡特及老布殊嘅「一任總統俱樂部」。

港股連升五日，上周五恒指升104點，報21,012點，乃五個月以來首次重返兩萬一樓上收市。薄熙來被雙開，十八大終於定到召開日期，唔少人憧憬A股八日假期之後，今日復市開高。不過觀乎上星期三日市，恒指累積升172點，平均一日唔夠六十點，有心無力情況明顯，個人估計今日A股能否升住收市，機會只係五五波。

波羅的海指數近期由低位勁彈三成五，去到875點，刺激一眾航運股大反彈，中國遠洋（01919）、中海集運（02866）、中海發展（01138）、太平洋航運（02343）升幅介乎4.6至5.2%。但周末同一個海運公司高層傾開，佢話最近唔少新船落水，供應量大增之下，運費只係止跌，未見反彈，歐洲航線唔少更係連半滿都講唔上，船東都嗌緊救命。

根據股神科斯托蘭尼的遛狗理論，話實體經濟同股市嘅關係，就同主人與狗一樣，不論狗向前向後跑得多遠，最後都回到主人身邊，大家朝着一個方向。航運股目前平均市帳率0.5至0.6倍，已反映一兩年內業績見紅的事實，或者有一炒的條件，但博反彈緊記千祈唔好同佢談戀愛，始終反映運費的波羅的海指數勁彈之後，仲只係去年底的四成左右。

安踏可候調整買貨

醜股大翻身的仲有體育用品股，自上月底瑞銀報告唱好後，未停過飆升。值得一提，安踏（02020）及李寧（02331）兩隻股係基金掃貨主力，上星期升勢持續，成交卻不升反跌，如果今個星期唔見新錢掃貨，短期回吐壓力應該唔細。

由高庫存開始消化的角度睇，體育用品股最壞時候應已成過去，不過揀股應先考慮滲透率高、資產負債表較佳者，心水依然是安踏。上半年安踏的庫存日數上升至五十日，不過自由現金流見改善，減長短債後淨現金近25億人民幣，為高息政策的維持提供保障，唯一缺點是兩星期內由5.05元炒上6.5元，升勢有過急之嫌。若回到5.7至6元間，捧場客可重新考慮。