樓市出更：工廈批改酒店急飆1.3倍

活化工廈措施吸引愈來愈多工業家申請將工廈改裝做酒店，劉Sir收到政府資料，截至今年九月底城規會已經批准11宗工廈改裝酒店申請，合共提供酒店房間多達3,232間，較去年同期多咗約1.3倍，其中以葵涌區佔54%最多。

劉Sir忽發奇想，如果呢批房間用晒做政府倡議嘅「過渡性住房」，新增住宅供應咪等於一個大型鐵路上蓋項目咁多。

城規會畀咗份資料劉Sir睇，原來該會單喺今年已批出11宗工廈改裝酒店申請（包括修訂獲批方案），涉及3,232間酒店房，比起舊年同期約1,400間足足多咗約1.3倍。點解咁多申請，事關改裝工廈唔使補地價，只係要出改裝費就得。

而政府早排為咗紓緩短期住屋供應，主動提出工廈改為「過渡性住房」可行性，劉Sir覺得最快嘅途徑就一定係率先喺批咗改裝酒店嘅工廈項目上實行，就係短期內增加供應嘅最佳辦法，以今年批出嘅酒店房間為例，數字上已等同一個大型鐵路上蓋項目。

葵涌佔逾半數最多

有關數字仲睇到，舊年觀塘區係最多改裝酒店申請獲批個案，而今年已移師至葵涌區。

好似截至今年九月份獲批改裝酒店用途嘅葵涌工廈就有5宗，涉及單位多達約1,744個，佔整體獲批個案約54%最多。

其中最具規模係一月份批出嘅葵昌路100至110號運通製衣大廈，有成598個房間，該廈業主係香港經貿商會會長李秀恒。

雖然呢類申請普遍集中喺葵涌及觀塘區，但其實今年開始已有其他地區錄到改裝酒店申請獲批，好似亦係由李秀恒持有嘅油塘榮山工業大廈，同埋恒地（00012）新蒲崗大有街29號宏基中心，就分別准改建470及399間酒店房。

「過渡性住房」挑戰大

劉Sir認為活化工廈措施已開始普及，相信政府加緊研究及鼓勵工業大廈改裝做「過渡性住房」，一定可以紓緩短期住屋供應問題。

不過，劉Sir可以話畀大家知，「過渡性住房」仲有好多技術性問題要解決，如目前《城規條例》並唔容許商貿地段嘅物業改作住宅，加上住宅嘅地積比率、通風、採光及廚房等要求都同工廈截然不同。