Fundman睇市：黃金周褪色

假期期間，歐美股市日升日跌無方向，港股四日假期後復市，也顯得了無生氣，恒指高開111點後，一度突破21,000點關口，可惜A股仲休息緊，中資股走勢一般，好友顯得有心無力，恒指一度倒跌40點，最後升47點，報20,888點，主板成交回落至478億。

昨日市況確是意外地平淡，以為芬佬會趁眾多不明朗因素消除，第四季一開波risk on沽防守股買高beta股博食尾胡，點知得電訊設備股比較標青，最弊係公用、房地產信託基金（REITs）等高防守股出奇咁強勢，後市睇怕仲係有暗湧。

今年的內地黃金周假期，對於香港零售業來說，顯然有含金量不足之嫌，賓架界在whatsapp瘋傳的幾張相，顯示黃金周下，彌敦道金舖顧客得小貓三兩隻，廣東道名店人龍不再，反之大嶼山貝澳營地卻是人山人海。統計顯示「十一」當日到港旅客12.5萬，按年跌6%，令人擔心，剛剛先將黃金周訪港旅客增長由預期的20%調低到15%的貿發局，仲係流於樂觀。

幾隻金飾零售股股價從五、六月低位累積反彈唔少，景福（00280）升幅達116%、六福（00590）升90.6%、周生生（00116）升35.3%。毫無疑問，以產品平均售價，金飾股最有條件捱貴租，也因此在近月的反彈浪中升幅最大，但看來黃金周銷售令人失望的機會極高，昨日唔少大孖沙已經唔等黃金周銷售數字出籠，先鎖定既得利潤，未來幾日，看來仲係避之則吉。

地產股可放心持有

剛過去的四日假期中，本地地產商賣樓成績出奇咁好，新地（00016）售出超過330個單位，長實（00001）入門費達四千萬的豪宅盤「珏堡」，最後四個單位賣清，信置（00083）及恒地（00012）亦分別售出30及60個單位。多得美國聯儲局零息政策，通街平錢等人借，特區政府新措施亦都如泥牛入海，買家不為所動。展望幾隻土儲豐厚的大型地產股，繼續有資產重估條件，看官可放心繼續持貨等收成。

美國最大互惠基金Vanguard Group，前晚宣布將六個國際指數基金，合共5.4億美元資產，由現時追蹤MSCI轉為追蹤FTSE指數。另外，十六個以MSCI為benchmark的基金，亦一齊宣布轉以FTSE作為表現基準，目的為投資者慳錢咁話。消息一出，編製MSCI指數及開發風險管理產品的MSCI Inc.，前晚股價在華爾街急跌兩成七，創下上市近五年來最大單日跌幅。

看官唔好以為無MSCI指數基金，或揸MSCI Inc.就唔使理會，大行計過數，基於MSCI新興市場指數同FTSE新興市場指數的成分股差別，估計變動中，中國股市（也包括香港的H股）將會得益，錄得20億美元淨流入，其次為台灣及印度的12億及7億美元。相反，南韓屬於今次重災區，估計多達90億美元資金要由韓股流出，變動影響會在明年初開始反映，相信到時幾隻重磅A+H股票，會因此受惠。