股海實戰：置富產業強勢莫估頂

正當大家都被「放水」兩個字衝昏頭腦之際，A股尋日穿底，如同當頭棒喝，滬綜指收報2,024點，乃○九年二月二日以來嘅收市新低。港股亦受拖累，恒指午後跌幅擴大，埋單唔見250點，收報20,590點，成交527億元。觸發A股穿底，乃因為九月份滙豐PMI初值僅47.8，雖然已脫離八月份所創嘅四十一個月最低水平，但時值第三季尾，經濟復甦仍不明顯，令人擔心全年增長目標難以實現。

嚟緊三、四個禮拜又係尷尬期，皆因預期十月中旬十八大召開前，中央都唔會有咩大型救市行動，唔排除班空軍都係睇準呢一點，準備喺呢段時間發動攻勢。若然呢轉滬綜指要踩落1,850點，即係話現水平尚有8.5%下跌空間。

至於港股，下周期指結算前，好淡角力將愈來愈明顯，股海再次風高浪急，加埋十月初又有長假，若然唔想擔驚受怕，就惟有適度減磅，增持現金。阿莊手持尚有兩隻股份短線會定去留，其中數碼通（00315）宜守穩250日線14.9元，中國燃氣（00384）跌穿4.18元嘅話可先行沽出，等下試4元承接再謀翻兜。

新華保險沽壓沉重

尋日內險股新華保險（01336）跌勢轉急，其A股股價急挫逾7%，H股亦跌3.7%，聽聞管理層急召分析員電話會議派定心丸。近期股價沽壓源於公司八月份新單保費收入遜預期，加上嚟緊將有10億限售股喺年底解禁，且看管理層解畫，能否消除投資者嘅疑慮。

全世界都在加印銀紙，最終可能會換來惡性通脹，但人在江湖，好似祖國，明知再印銀紙唔對路，惜別無選擇。阿莊估計，唔少大戶會沿用今年以來嘅策略，就係盡量找尋定息回報，債券市場將繼續保持暢旺，而高息嘅穩陣股亦會繼續受青睞。

從呢個角度出發，兩隻政府iBond（04208及04214）也許能再吸引投資者目光，而房地產信託基金憑着資產價格及收入齊升，以及高息特點，亦可繼續跑贏大市。

置富產業信託（00778）近年進行兩項收購，上半年業績勝預期，物業收入淨額同比增長近兩成，物業出租率為96.5%，平均續租租金調升率為20.6%，相信全年業績可報佳音。

置富現價5.87元，往績息率近五厘，股價距離五十二周高位6.1元不遠，已升穿唔少大行嘅目標價，但睇形勢唔使咁快估頂住。作為參考，本月以來股價喺5.8元水平整固，相信調整完成可再發力，升穿6.1元，下一阻力區喺6.3至6.5元區域，主要支持喺50日線5.5元。