樓市出更：坪洲地估值谷高25%

美國第三輪量化寬鬆（QE3）谷起樓市氣氛，咁啱坪洲東灣B地盤同埋將軍澳第66C2區限量地今日截標，有測量師認為QE3有正面作用，其中坪洲地皮估值更獲大幅調升約25%，最新估值2,850萬元，每方呎樓面地價近2,000元，係市場最新上限價。

睇番今個星期熱爆嘅樓市，劉Sir就知道QE3帶來嘅反應相當唔嘢小，好似中原黎堅輝都話，QE3影響正面，加上最近政府推出嘅坪洲地投標者都唔少，估計呢幅坪洲東灣B地盤成交價約2,850萬元，樓面地價近2,000元，即較之前估值約1,600元大幅調升約25%。

佢仲打趣話，「瘦田無人耕，耕開有人爭」，論質素，呢幅坪洲地享有海景，而規模亦唔算大，相信可以吸引發展商、小型公司甚至乎用家入標競投。劉Sir認為，佢調升估值都真係有佢嘅道理。

恒基吼住將軍澳地

至於另一幅將軍澳南限量地就未有測量師再次調整估值，劉Sir相信係因為嗰邊土地供應比較充裕，嚟緊都仲有土地陸續推出，加上需作限量發展，估值唔會貿貿然調高亦可以理解。

不過，地皮「永久海景」嘅條件始終唔會變，高力國際（香港）譚智仁就話，項目發展密度較低，適合發展中高檔住宅，所以地價會比之前賣出嘅同區地皮呎價約4,000元貴，預計樓面地價約5,015元，估值約24.4億元。目前市場估計土地樓面地價則由約4,110至5,200元。

另外，新地（00016）已經表明會入標，集團副董事總經理雷霆話，會獨資競投該限量地。另恒地（00012）副主席李家誠都話，對呢幅將軍澳地皮有興趣，會視乎價錢再決定會否競投。