股海實戰：中移80元邊可買

恒指繼續窄幅上落，板塊焦點唔多，仇日政治氣氛影響下，東風（00489）繼續捱沽，另聽聞有日商擬關閉內地近200家便利店，阿莊諗起港資嘅利亞零售（00831）早年已開始喺內地開便利店，照計可乘日資對手暫時撤離而加快搶攻市場份額，實乃好消息，惜見尋日交投淡靜如故，未見炒家蹤影。

市場另一焦點乃被中企點石成金嘅殼股，表表者係僑福（00207），七月獲中糧香港入主全購作價才每股0.92元，尋日高位做7.06元，信者得救！招商地產入主嘅東力（00978）同萬科入主嘅南聯（01036）呢排都有異動，就連前年獲遠洋地產（03377）入主嘅盛洋（00174），尋日都以大成交炒高52%。傳獲內地四大上市房企金地入主嘅星獅（00535），估計復牌後亦有一番炒作。

尋日提到同電子廠家飯聚，呢位老兄嘅家族係首批回內地設廠嘅港商，喺深圳打滾咗幾十年，聽佢講經過近兩年中央持續調控樓市，少咗土地相關收入，加埋大運會使咗三千億人仔，深圳政府嘅財政亦面臨挑戰，最近傳來有分區公職人員工資要延遲發放，最終搞到要中央出手，由國務院免去深圳市三年上繳中央嘅收入（估計有數千億元人仔）。連廣東最富庶嘅地方政府財政亦如是，睇嚟歐、美雖差，但中國亦唔好得幾多！

拓展4G着眼未來

中移（00941）憑着行業龍頭地位、可觀而穩定嘅現金流、再加上有成四厘息，乃中字股中嘅避險之選。

之不過，近月股價跑輸同業同大市，皆因市場關注其4G業務成本高昂，或對盈利造成影響。但阿莊就認為，拓展4G係大勢所趨，要保住龍頭地位，中移無得選擇，反而應該以更快嘅速度推展，搶佔市場份額，就算開始初期，新業務每年有一至兩百億人仔嘅虧損，但以中移一年賺千五億人仔而言，影響係有，但承受得起！

再講，呢幾年中移嘅盈利表現四平八穩，難得如今終於有新嘅增長平台出現。阿莊相信，喺三大電訊股中，中移嘅財政實力最雄厚，故斷無道理因為4G而睇淡中移。其股價由上月中旬高位92.6元回落至本月低位81.1元，尚處長期上升軌，若然嚟緊政治因素令大市再現震盪，可留意中移喺80元邊嘅承接，穩守其上，可考慮趁低收集。