樓市出更：梅艷芳遺產高9%秒殺

第三輪量化寬鬆（QE3）措施令本港樓市買賣氣氛急轉熾熱，屬已故樂壇天后梅艷芳（梅姐）遺產嘅跑馬地毓秀大廈頂層連天台單位及一車位，尋日「翻叮」再拍賣，開價900萬元，較之前高120萬元，但仍吸引四組人士競投，單位最後以980萬元賣出，實用面積計呎價逾2萬元，較開價高近9%。

劉Sir尋日去咗忠誠拍賣行舉行嘅拍賣會，吸引咗二十幾個有興趣人士到場，部分準買家更要企出門口伸個頭入嚟睇。

其中最矚目莫過於翻拍梅姐嘅遺產物業毓秀大廈頂層C室連天台單位及一個車位，單位實用面積約471方呎，另連同約90方呎露台同埋約440方呎天台。

物業拍賣開價900萬元，同上個月中首次拍賣開價780萬元，高咗約15%，每口競價10萬元，不過仍無減有興趣人士競投意欲，開首三分鐘，四組有興趣人士激烈競投，到尾聲只得兩組人士，拍賣師為提高競投氣氛，後段三度將每口競價調低至1萬元。

大埔聚豪搶貴18%拍出

上址最終喺五分鐘內以980萬元售出，上次個單位曾獲出價至1,040萬元，但最終被收回，買家笑住口同劉Sir話：「呎價平，好抵買」。而忠誠鄭世傑（Alger）亦對是次物業成交價好滿意。另外梅姐嘅哥哥梅啟明尋日亦有到場，但就無舉手，佢話唔認識新買家，亦都無搵人入場競投，雖然買唔到，但無覺得失望。

Alger話，QE3之下，300萬元細價樓好搶手，如尋日有14項物業拍賣，成功售出5項，除上址外，其中，葵涌寶星中心A座高層4號室事故住宅單位，經過7口競價後，好快以170.7萬元售出，較開價高約8%，低市價亦只10%，可見買家幾進取，呎價4,200元唔使。另外大埔聚豪天下雙號屋以2,250萬元售出，高開價逾18%，呎價逾6,700元。

天盛綠表價貴絕仍收回

至於同場拍賣嘅天水圍居屋天盛苑E座中層1號室，綠表價開248萬元，已貴絕該區居屋綠表單位成交價，雖然有買家舉手承接，但最終未到底價收回。