股海實戰：收集環保概念股

喺美國聯儲局議息結果公布前，港股觀望氣氛較濃，市場其中一個焦點係iPhone 5概念股，阿莊持有嘅數碼通（00315）執到支好籌，由於iPhone 5只支援1800Mhz頻段，暫時全香港得數碼通獨有，難怪尋日股價一支獨秀，高位見15.9元，收報15.78元，升4.7%，且看呢轉能否重上50日線16.2元樓上再定去留。

一直斯人獨憔悴嘅太陽能股突然發力，保利協鑫（03800）領軍，但論升幅則以卡姆丹克（00712）最勁，升21%。LED燈飾股亦掹車邊炒一轉，真明麗（01868）、達進東方照明（00515）同雷士（02222）升幅介乎2.9至6.7%。

中投三寶全線高收

好耐冇提過嘅「中投三寶」都全線高收，除保利協鑫升一成外，旭光（00067）同中芯（00981）均升逾3%。似乎喺短期指數上望幅度有限之下，炒家轉戰落後股，未知係咪升市尾聲嘅現象。

尋日阿莊講嘅北控水務（00371）跌咗兩格，可視為正常調整。再睇其他水股，中國水務（00855）走勢唔錯，升4.4%。從事環保業務嘅光大國際（00257）亦值得關注，上月底公司以先舊後新方式配股，集資逾12億元，配股有九十日禁售期，而至今為止股價守穩配股價3.58元之上，尋日收報3.83元。

其實，光國唔單只經營環保水務項目，還兼營垃圾發電等環保能源業務，近年更將產業鏈延伸至環保設備製造業務，嚴格嚟講，係一隻更全面嘅節能環保股份，且業務遍布江蘇、山東、安徽、廣東、浙江及海南多個省份等全國各地。

公司業務發展迅速，資金需求大，至今年六月底，手頭現金約22億元，資產負債比率為53%。最近成功集資，有助加強財務能力，應屬正面。

今年上半年公司賺6.05億元，乃去年度純利嘅75%，相信本年度盈利增長足夠有餘，抵銷配股對每股盈利所造成嘅攤薄作用。現價往績市盈率17倍，對於一家處於高增長嘅環保股份而言，估值吸引。喺3.6至3.8元可作中線收集，六個月目標價睇一○年高位4.53元，不跌穿3.3元可繼續持有。