Fundman睇市：國美勝在平 小注一炒亦無妨

尋日德國憲法法院裁定歐洲穩定機制（ESM）及財政公約合憲，雖然加上附帶條件，無德國下議院核准，ESM出資唔能夠超過1,900億歐元，但已等同向ESM合法及可行性開綠燈。港股連升五日，恒指再有217點進帳，收報20,075點，主板成交503億元，可算配合升市。

尋晚蘋果公司新iPhone發布會，明日凌晨輪到聯儲局議息後聲明。個人估計，今個月出QE3機會只係五五波。事實上，即使再重複上一份議息聲明，繼續強調需要時「有招可出」都唔係壞事。瑞信環球策略報告話，對上三次聯儲局出招，即QE1、QE2及OT的經驗，期間升幅最大股市依次係南韓、俄羅斯及台灣，分別升34.9%、26.6%及26.2%，由於今次QE3預期已炒了好一陣子，由六月低位計，三個股市經已分別升11.3%、20.7%及9.7%，美國印銀紙因素多少已被反映？好難講，但sell on fact風險增加卻是不爭事實。

業績見紅，七月時隊到開巷的國美（00493），近期矮仔上樓梯日日升，尋日漲4.8%，唔經唔覺由浪底反彈55%，到底為乜炒高？從基本因素，第二季勁蝕5.68億人仔，同店銷售估計下半年會好過上半年，但講緊不過是跌幅收窄，股價由五十二周高位3.22元跌掉四分之三，現價市帳率（估計全年業績見紅無市盈率）0.8倍，可能是唯一可取之處，當垃圾股跟炒一轉無妨，但唔多啱價值投資者。

中國是今年表現最差的主要市場，上星期，滬綜指才跌至2,029點的三年半低位，遠遠落後於歐美市場。由上兩次QE，資金湧向天然資源的經驗，唔少人擔心油價回升（由六月低位已累升27%），會令中國出口製造業的成本壓力百上加斤，而通脹回升，也令人行推貨幣寬鬆空間進一步收窄。

博反彈咪預航運股

俗語有云便宜莫貪，上個月走去博航運股反彈，最終交學費收場。八月內地進口數字差到極，固然通地眼鏡碎片，未來一兩個月是聖誕出貨高峰期，反映乾散貨運費的波羅的海乾散貨指數，近兩個月由約1,200點滑落至662點，差少少就番到二月份的N年低位647點，此情此景唔係好兆頭。綜觀內地大宗商品庫存積壓無改善，航運股的確未有運行，中國遠洋（01919）半年勁蝕48.7億人民幣，比預期多出近五成，業績後沽空收斂，但反彈力度微弱，睇嚟乜都可以炒，唯獨航運股仲未係時候。