股海實戰：北控水務睇高一線

美股道指創五年新高，恒指順勢高開138點後，重上兩萬點關，尾市未見太大回吐壓力，收報20,075點，升217點，成交增至504億元。市場對美國即將推QE3期望甚高，樂觀情緒高漲，但阿莊總覺得今時唔同往日，QE嘅刺激作用一次比一次弱，從近期資源股升勢只屬一般便可見一斑。

個股方面，組合持有嘅中國燃氣（00384）尋日上過4.35元，收報4.29元，升0.2%，成交增加，擔定櫈仔等睇戲！久未現炒風嘅玻璃股午後發力，中國玻璃（03300）及洛陽玻璃（01108）升幅均逾一成，但洛玻成交唔算多；信義玻璃（00868）表現相對失色，僅升2.6%。

英皇國際估值吸引

呢期地主股發威，恒地（00012）股價創一年新高、新地（00016）喺業績公布前見五個多月高位。除咗一線地主外，見到英皇國際（00163）由上周四低位1.57元，抽到上尋日高位見1.87元。英皇本年度將有多個樓盤售樓收益入帳，現價市帳率唔到4倍，斷秤估值仲係平，加埋嚟緊英皇集團慶祝七十周年，此前系內股份以呢隻最省鏡。短線有回吐係正常，但即使係繼續炒上，又有幾出奇？

北控水務（00371）喺上月底公布中績前股價曾低見1.46元，但結果公布中績理想，半年賺3.86億元，增25%，加上自轉型水務以來，首次派發中期息，每股2仙，股價反覆回升，尋日收報1.74元，升2.35%，成交5,103萬元。

早前公司就收購母公司資產簽訂框架協議，阿莊喺八月初亦曾作推介，指股價不跌穿1.3元可續持有，目標上望1.7至1.8元，如今目標已實現。事實上，隨着內地經濟持續發展，水務行業大有可為，加上有北控（00392）作後盾，無論喺爭取新項目以及融資能力都較其他民企同業強，乃環保水務股中嘅實力之選。待年底前完成注資交易，將有助進一步鞏固盈利基礎，前景可睇高一線。

有鑑於公司派發中期息，又落實注資，股價升勢有成交配合，呢轉成功企穩250日線1.8元嘅話，重返2元樓上指日可待。