魚缸Blogger：中國南車具炒作條件
AIG尋日小試牛刀，減持友邦（01299）6億股，雖然傳統智慧話抽水潮湧現係個市見頂先兆，但眼前炒歐美放水嘅熱情未退，後市仍然有向上嘅想像空間。
消息指近日內地發改委一炮過批咗25個城市軌道交通項目嘅建設規劃，同埋20個基建項目，阿爺要穩增長嘅決心相當明顯，基建、鐵路類股份尋日即時應聲彈起，論值博，似乎前兩日急跌嘅中國南車（01766）最有睇頭。
雖然前日急跌嘅原因未明，但中國南車佔內地機車市場近五成份額，而母公司早前亦拍心口話會喺未來十二個月作出增持，而且阿爺提振基建嘅措施應該會陸續有嚟，中國南車有炒作條件，主要阻力喺6蚊。
中國南車（01766）
阻力位：6元
支持位：5元