股海實戰：吉汽現價諗得過

呢個月港股難玩之處，在於失去「自我」，全睇中、歐、美面色﹗雖然特區政府積極推出穩定樓價措施，但都被視為遠水難救近火，加埋低息環境未變，磚頭仍有其吸引力，對樓市投資氣氛影響不太大，相關消息亦難左右大市。執筆時，傳來AIG配售友邦（01299）股份，涉及百多億元，呢啲淡市做得成過百億銀嘅大刁，都算唔錯！

金價尋日喺歐央行會議前夕成功突破每安士1,700美元大關，金礦股做好，招金（01818）及紫金（02899）升4至5%。另一個異動板塊係鐵路板塊，主要炒作發改委批覆25個投資額總額達8,000多億人仔嘅城軌項目，周二股價急跌嘅南車（01766）收復失地、南車時代（03898）升5%、中鐵（00390）、中鐵建（01186）及中自化（00569）升6至13%。其實政策消息對中企股嘅影響威力已大減，升跌只在乎炒作資金取向而已。

中燃買入等運到

阿莊近期多次提及嘅燃氣板塊亦有動靜，新奧能源（02688）及華潤燃氣（01193）股價同創五十二周即市新高，北控（00392）亦處五十二周高位。中國燃氣（00384）正等候有關中石化（00386）同新奧提購嘅進展，股價無升跌，收報4.27元。阿莊總覺得，舊高層回朝必有大龍鳳跟尾，遂以平均價4.27元買入3萬股等運到。

汽車股吉利汽車（00175）今年上半年賺10.2億人仔，同比增9%，其中有6億多人仔係來自政府補貼，可見國策對企業盈利支持嘅重要。首七個月公司實現總銷量25萬部，同比增7%，已實現全年銷售量46萬部嘅54%。隨着下半年公司有九款新車款推出市場，加上出口銷量增加有助抵銷內銷增長放緩嘅影響，只要限車令規模未有擴大，仍有望實現全年目標。

估值方面，吉汽現價預測PE約8倍，若然嚟緊真係有更多刺激消費嘅政策出台，照計年底前估值上番預測PE10倍都唔係太過分，即相等於約3元。再睇股價走勢，喺介乎250至50日線之間上落經已有四個月，現價正處於250日線2.47元，假設維持上落局面，現水平有得諗，升穿2.6元可再試上月高位2.8元，下穿2.3元止蝕。