樓市出更：免費拍賣成功吸盤

市場盤源短缺，影響成交量偏低，向來主打二手物業嘅私人拍賣行，亦要出招誘發業主放盤意欲，有個別拍賣行就趁機以免拍賣費吸客，針對過千萬元中上價物業，免收業主拍賣費；該拍賣行同劉Sir講，今次出招令豪宅單位佔單日拍賣放盤比例大增至25%；而個別拍賣行稱只對個別熟客免收拍賣費，暫無意跟隨。

市場缺盤，令唔少代理朋友傷透腦筋，連拍賣行老友亦同劉Sir呻，拍賣盤源愈來愈少，尤其係額外印花稅（SSD）措施推出以後，市場住宅盤源大減，個別拍賣行為咗增加拍賣盤源，近排罕有咁針對逾千萬元物業嘅拍賣盤，免收業主拍賣費，藉以增加更多中上價盤源。

中上價盤拍賣顯著增加

呢間拍賣行下周一將會拍賣二十項物業，當中就有5項即25%屬於過千萬元嘅物業，包括較少推出拍賣嘅西半山高雲臺單位，同埋愉景灣洋房等，較過去十幾次拍賣嘅過千萬元物業顯著增加。

拍賣行負責人話，兩年前佢哋平均每月都促成1單過千萬元嘅拍賣成交，可能依家市況旺加上無咩盤，所以希望透過呢次免拍賣費吸多啲盤，佢哋一般拍賣收費每次3,000元，現時拍一次送一次，不過買賣雙方都要畀番1%佣金。

個別拍賣行暫無意跟隨

不過，亦有個別拍賣行負責人話，過去不時都會推出呢類噱頭，不過目前盤源尚算穩定，所以未有打算跟隨，一般拍賣收費5,000至1萬元拍賣兩次。另一間拍賣行則指出，拍賣收費會彈性處理，個別「熟客仔」都會免收拍賣費，一般5,000至1萬元可拍賣四次。

上環事故單位連約開拍

此外，拍賣場不乏較搶手嘅「另類」物業，如葵涌寶星中心A座高層4室事故單位，面積約407方呎，本月中以158萬開價拍賣，呎價約3,882元，較市價低約兩成。

另外，上環寶泰大廈低層B室事故單位，實用面積約357方呎，連約以398萬元下周開價拍賣，據了解，該單位銀行估價達約420至450萬元。