股海實戰：消費政策醞釀出台

雖然尋日恒指上下波幅僅157點，但唔少中資股股價卻明顯受壓，如財險（02328）跌4%、民行（01988）同招行（03968）跌3%、雅居樂（03383）再跌4%，鐵路股中國南車（01766）跌7.8%，大市成交縮減至只有344億元，單睇指數表現，顯然未能全面反映魚缸慘況！

內地傳媒指《國內貿易發展規劃（2011-2015）》將出台，相關部委將推出一系列刺激消費政策，但零售股無動於衷，暫乏鑊氣，皆因缸邊友認定十八大前宏觀政策不會有重大改變，索性唔做唔錯。事實上，單睇內銀放貸一環，傳聞八月份四大行新增貸款約2,200億人仔，按月僅持平，反映減息以至發改委加快審批新項目嘅措施，提振經濟成效有限。

再睇內房環節，八月份百城新建住宅平均價按月僅升0.24%，同比則連續五個月下跌。預期未來數月房企促銷庫存力度要加大，加上新供應湧現，年底前內房市場將再次面臨嚴峻考驗。

講到內房，近日留意到內地某學府進行嘅調查報告顯示，目前內房三分之一嘅產能已足以滿足未來長期均衡供需，並認為房產泡沫將於五年內爆破，三分之二嘅房企會「垮掉」。呢個結論頗令人震驚，某程度亦說明中央堅持死抓內房調控不放實有其苦衷。

個股方面，內房股恒大地產（03333）上周公布完中績後，股價跌勢未止，尋日全日低位做2.85元，乃去年十二月中旬以來即市新低，收報2.86元，跌4%，成交1.8億元。呢排唔見隻股沽空有咩異動，即係話呢轉質落真係「堅沽」﹗

市場關注內房負債

講番恒大中績，論盈利大致符預期，但財務狀況卻備受關注，事緣其手頭現金減少12%，至247億元人仔，淨負債率升至96.1%。要知道，投資者對房企同民企嘅財務數字特別敏感，恒大淨負債率之高連大行亦吃驚！此外，今年上半年，恒大實現嘅合約銷售額僅為全年目標嘅43.8%；另一方面，下半年公司計劃支付嘅土地款為80億人仔，明年則為134億人仔，資金需求不輕，一旦下半年銷情未達預期，財務狀況令人擔憂。

所以話，恒大股價弱勢有因，嚟緊宜密切注視其第三季銷售進度，以衡量資金回籠情況；在針對內房嘅調控持續，宏觀經濟形勢充滿不明朗素下，股價上升動力受到限制。所以，呢啲位想撈貨宜三思；仍揸貨者，亦宜及早重估風險水平，嚴守止蝕。