樓市出更：街坊舖炒到嚟

好多炒家都去咗二線民生區尋寶，帶動咗區內揸住貨嘅業主都忍唔住要放售；有代理話，單喺過去兩周，民生區地舖放售盤突然多咗差唔多30個，粗略估計市值共達19億元，當中啱啱放售嘅西環堅尼地城聯康新樓等一籃子舖位，市場料成交價最少4.5億元。

二線區地舖有民生消費支持，所以唔少投資者同散戶都積極搵盤，就算一向放售意欲唔高嘅業主，都伺機放盤套現。

依家市場突然多咗嘅呢類民生街舖放盤，主要分布喺西環、灣仔、柴灣、牛頭角、荃灣同埋上水等，呢幾區人口多，加上入場費較低，一般1,500萬元左右已經有交易。

西環一籃子料賣4.5億

世邦魏理仕郭振昌同劉Sir講，上述放售一籃子舖位，係聯康新樓、聯友新樓、聯基新樓及聯昇新樓地下，同埋一樓多個商舖，及連天台等樓面，整批物業總樓面近5萬方呎，依家租戶包括上市公司旗下嘅品牌，可謂鐵約盤，每年租金收入加埋約1,000萬元，加上未來西港島線有分站喺附近，業主本來諗住收租好過，但由於好多客問盤，依家試吓放盤，市場估計成交價最少4.5億元，收租回報超過兩厘。

西環食住港鐵線效應，近排業主都積極放盤，中原麥惠良話，同區皇后大道西115至119號低層地下、地下商舖、1至2樓部分，業主揸咗超過十年一直收租，依家都肯放盤，叫價5.5億元，呎價逾9,800元。不單港島有盤蜂擁放售，新界北都開始增加，美聯朱志龍稱，上水龍琛路16號地舖依家放售，意向價約4,500萬元，呎價逾3.7萬元。

事實上，工商舖物業愈炒愈旺，中原鄭得明話，旺角梭椏道25號地下A舖連閣樓啱啱賣咗約1,708萬元，原業主一年帳面袋約570萬元，新買家即刻開價約1,980萬元放摸貨。另聽講張姓投資者亦火速以1.3億元摸出中環歐陸貿易中心地下Y舖，一個月帳面大賺2,500萬元。

荃灣車位兩周賺21%

利嘉閣葉斐明話，有投資者上月斥435萬元購荃灣ONE MIDTOWN 6個私家車位，剛以85萬元摸出其中一個，兩周帳面賺15萬元，賺幅逾21%。據悉，金鐘遠東金融中心高層單位每方呎73元租出，月租10.4萬元。