股海實戰：數碼通升勢一觸即發

上周五伯老喺Jackson hole行長年會中講話，雖未有明言何時推出QE3，但就重申肯定寬鬆貨幣政策嘅成效，且不排除會採取行動刺激就業市場，消息令美股高收。但另一方面，上周五內地公布八月份官方製造業PMI遜於預期，顯示內地經濟仍然疲弱，估計港股會維持上落格局，但恒指波幅區已下移，料本周介乎19,000至19,800點。

上周四收市後特區政府宣布樓市新十招，此前地主股股價全線走低。由於出嚟嘅具體措施與市場預期相若，故見周五地主股普遍反彈，但力度溫和。阿莊依然相信，喺低息環境支持下，地主股跌極有個譜，只係六月以來累積一定升幅，目前不特別值博，且先觀望新十招對樓市嘅影響，再作評估。

海通證券低位加注

八月份滬綜指創四十四周新低，似乎目前市場已有心理準備，滬綜指要下試兩千點大關。無論係指數抑或交投表現，下半年首半截幾可肯定又再泡湯，難怪近期券商股股價反覆向下。阿莊話會留意低吸機會嘅海通證券（06837），上周五跌至全日低位8.49元，收報8.51元，14日RSI落到27，加上成交明顯增加，遂作出加注決定，喺8.51元買入一萬股。

據市場流傳，iPhone 5將於九月十二日公布，並即時接受預購，九月廿一日正式登場。海外網站引述消息指，美國電訊營運商Verizon全體員工，將於九月廿一至三十日內暫停休假，這與上周市場流傳AT&T擬於九月第三或第四個星期開始銷售新一代iPhone產品嘅消息脗合。

每次iPhone有新產品，對本地主要電訊營運商數碼通（00315）都係好事，皆因可刺激新客上台同帶動增值服務業務增長。參考去年十月四日蘋果公司宣布推出iPhone 4S，八月中數碼通股價先行炒起，到九月下旬股價見頂回落，跌至十月初才再觸底回升。今個八月數碼通股價無大異樣，公司將於明日宣布末期業績，且看股價之後會否再展升勢，向上較大阻力喺18.5元，回吐宜守15.5元。